އެމްޑީޕީގެ ޗެއަރޕާސަންގެ އިންތިހާބުގައި ވާދަކުރައްވާ، އިމްތިޔާޒު ފަހުމީގެ ޓީމުގެ ފަރާތުން އެ ޕާޓީގެ ޝަކުވާ ބަލާ ކޮމެޓީއަށް ހުށަހެޅި މައްސަލައިގައި، އެ ކޮމެޓީން ނިންމާފައިވާ ނިންމުން ބާތިލު ކަމަށް އެމްޑީޕީގެ އިސްތިއުނާފު ފަނޑިޔާރުންގެ މަޖިލީހުން މިއަދު ނިންމައިފިއެވެ.

އިންތިހާބާއި ބެހޭ ޝަކުވާ ބަލާ ކޮމެޓީއަށް އިންތިގެ ޓީމުން މައްސަލަތަކެއް ހުށަހެޅީ ޗެއަރޕާސަންގެ އިންތިހާބުގައި ވާދަކުރައްވާ އިމްތިޔާޒު ފަހުމީއަށް ތާއީދު ކުރާތީ ސަރުކާރުގެ ބައެއް މުވައްޒަފުންނަށް ބިރު ދައްކަމުންދާކަމަށްބުނެ އެވެ.

އެއީ ގދ. ގައްދޫ ފެނަކަ ކޯޕަރޭޝަން ލިމިޓެޑްގެ އޮފީހުގެ މެނޭޖަރު ކަމުގެ މަގާމުގައި ހުންނެވި ގދ. ގައްދޫ، އޭޝިޔާ، އިލްހާމް ރަޝީދު އެކުންފުނީގެ މުވައްޒަފު ގދ. ގައްދޫ، ފުނަމާގެ، އާމިރު އަބްދުﷲއަށް ފޯނުން ގުޅައި، ޗެއާޕާސަން ކެންޑިޑޭޓް އިމްތިޔާޒު ފަހުމީއަށް މަރުހަބާ ދެންނެވުމަށް ނުދިއުމަށާއި އިންތިހާބު ކަންކަމުގައި އިމްތިޔާޒު ފަހުމީއަށް ތާއީދު ނުކުރުމަށް އަންގައި، އިލްހާމް ރަޝީދު މަގާމުގެ ނުފޫޒު ބޭނުންކޮށްގެން އާމިރު އަބްދުﷲ އަށް ބިރު ދެއްކި ކަމަށް ބުނާ މައްސަލައެކެވެ.

އެ މައްސަލަ ބެލުމަށްފަހު މިދިޔަ އޭޕްރީލް މަހުގެ 23 ވަނަ ދުވަހު އެ ކޮމެޓީންވަނީ، ވަޒީފާގެ ބިރު ދައްކާފައިވާކަން ސާބިތުވާކަމަށް ނިންމައި އެގޮތަށް އިންތިގެ ޓީމަށް ޖަވާބު ދީފައެވެ.

ނަމަވެސް، އިންތިއާއިއެކު މި މަގާމަށް ވާދަކުރައްވާ ފައްޔާޒު އިސްމާޢީލްގެ ޓީމުން އެކަން ދޮގުކުރެއެވެ. އަދި އިންތިހާބާއި ގުޅޭ ޝަކުވާ ބަލާ ކޮމެޓީ އެކުލަވާލާފައިވަނީ ރަނގަޅަށް ނޫންކަމަށް އެ ޓީމުން ދަނީ ބުނަމުންނެވެ. އެކަންކަން ފާހަގަކޮށް ފައްޔާޒުގެ ކެމްޕޭން ޓީމުންވަނީ، އެ މައްސަލަ އެ ޕާޓީގެ އިސްތިއުނާފު ފަނޑިޔާރުންގެ މަޖިލީހުގައި އިސްތިއުނާފު ކޮށްފައެވެ.

#MDPhingaalan campaign team ge faraathun isthiunaafu kuri massala ga shakuvaathah beli committee ekulavaalevi faivanee MDP ge Inthikhaab aa behey gavaaidhaa khilaafah kamah Isthiunaafu Fandiyaaruge Majlis in ninmavaifi pic.twitter.com/3U5DSUtXuX

— Ibrahim Waheed (@ibreys) May 9, 2022

އިސްތިއުނާފު ފަނޑިޔާރުންގެ މަޖިލީހަށް ހުށަހެޅި އެ މައްސަލަ ބެލުމަށްފަހު ނިންމިގޮތް، ފައްޔާޒުގެ ކެމްޕޭން މެނޭޖަރު އިބްރާހީމް ވަޙީދު މިއަދުވަނީ ޓްވިޓާގައި އާންމު ކުރައްވާފައެވެ. އެގޮތުން އޭގައި ބުނެފައިވަނީ، 12 މާރޗް 2022 ގައި ޕާޓީގެ އިންތިހާބާއި ބެހޭ ކޮމެޓީން އެކުލަވާލާފައިވާ އިންތިހާބާއި ބެހޭ ޝަކުވާ ބަލާ ކޮމެޓީއަކީ އެ ޕާޓީގެ އިންތިހާބާއި ބެހޭ ގަވައިދުގެ 46 ވަނަ މާއްދާގެ (ހ) އާއި ހިލާފަށް އެކުލަވާލާފައިވާ ކޮމެޓީއެއް ކަމަށެވެ.

އެހެންކަމުން، 23 އޭޕްރީލްގައި ޝަކުވާ ބަލާ ކޮމެޓީން އިންތިގެ ޓީމަށް ފޮނުވާފައިވާ، އެ ކޮމެޓީގެ ނިންމުންތަކަކީ ބާތިލު ނިންމުންތަކެއް ކަމަށް އިސްތިއުނާފު ފަނޑިޔާރުންގެ މަޖިލީހުންވަނީ ނިންމާފައެވެ. އަދި އެމްޑީޕީގެ އިންތިހާބާއި ބެހޭ ގަވާއިދާއި އެއްގޮތަށް އެކުލަވާލެވޭ ޝަކުވާ ބަލާ ކޮމެޓީއަކުން ގަވާއިދާއި އެއްގޮތަށް މައްސަލަތައް ބެލުމަށް އިންތިހާބާއި ބެހޭ ކޮމެޓީއަށް އެންގުމަށް ވެސް ފަނޑިޔާރުންގެ މަޖިލީހުންވަނީ ނިންމަވާފައެވެ.

އިސްތިއުނާފު ފަނޑިޔާރުންގެ މަޖިލީހުގެ ނިންމުމެއްކަމަށްބުނެ އިބްރާހީމް ވަހީދު އާންމު ކުރެއްވި ނިންމުން ރަސްމީކޮށް އަދި އެމްޑީޕީން އާންމު ކޮށްފައެއް ނުވެއެވެ.

އެމްޑީޕީގެ ޗެއަރޕާސަންގެ އިންތިހާބުގެ ފޯރި ގަދަވެ އެމްޑީޕީގައި އުފެދިފައިވާ ރައީސް ނަޝީދާއި ރައީސް ޞާލިޙްގެ ފެކްޝަނުން ނެރެފައިވާ ކެންޑިޑޭޓުންނާއި އެ ކެންޑިޑޭޓުންގެ ސަޕޯޓަރުންގެ މެދުގައި ދަނީ ފޯރިގަދަ ބަހުސްތަކާއި ތުހުމަތުތައް ރައްދުކުރުންތައް ހިނގަމުންނެވެ.