މިއަދު ކުރިޔަށްދާ އެމްޑީޕީގެ އެތެރޭގެ އިންތިހާބުގައި، ވޯޓުލާ މަރުކަޒަށް ދާން ދަތިވެފައިވާ ފަރާތްތަކަށް ފޯކައިދޫ ސިއްހީ މަރުކަޒުގެ އުޅަނދެއް ބޭނުންކޮށްފައިވަނީ، ކުރިންވެސް އެ ރަށުގައި އަމަލުކުރަމުން އަންނަ އުސޫލުގެ މަތިންކަމަށް އެ ރަށު ސިއްހީ މަރުކަޒުން ބުނެފިއެވެ.

އެ މަރުކަޒުން މިކަން ސާފުކޮށްދީފައިވަނީ، މި އިންތިހާބުގައި ޗެއަރޕާސަންގެ މަގާމަށް ވާދަކުރައްވާ މާފަންނު އުތުރު ދާއިރާގެ މެންބަރު އިމްތިޔާޒު ފަހުމީގެ ކެމްޕޭން މެނޭޖަރު އުނގޫފާރު ދާއިރާގެ މަޖިލިސް މެންބަރު މުޙައްމަދު ވަޙީދު، އެރަށު ސިއްހީ މަރުކަޒުގައި އޮންނަ އުޅަނދެއްގައި ހަމައެކަނި ފައްޔާޒު އިސްމާޢީލަށް ތާއީދު ކުރާ މީހުން އުފުލައިދޭކަމުގެ ޝަކުވާ އުފުލުމާއި ގުޅިގެނެވެ.

މިކަމާއި ގުޅިގެން ސިއްހީ މަރުކަޒުގެ މެނޭޖަރު އަޙްމަދު އަންވަރު ވިދާޅުވީ، އެ ރަށަކީ އެއްވެސް ދުއްވާ އެއްޗެއް އޮންނަ ރަށަކަށް ނުވާތީ ހާއްސަ އެހީއަށް ބޭނުންވާ މީހުންނާއި އުމުރުން ދުވަސްވީ މީހުންނަށް، ވަކި ފިކުރަކަށް ބެލުމެއްނެތި ސިއްހީ މަރުކަޒުގެ އުޅަނދު ބޭނުންކުރަމުން ދާނެކަމަށް ވާނީ ކުރިން އަންގާ އިއުލާނު ވެސް ކޮށްފައި ކަމަށެވެ. އަދި މިކަމަކީ ކޮންމެހެން ވޯޓާއި ދިމާކޮށް ފެށިކަމެއް ނޫންކަމަށާއި، މިއީ ކުރިންވެސް އެކަން ކުރަމުން އައިގޮތްކަމަށާއި އަބަދުވެސް ރައްޔިތުންނަށް އެ ހިދުމަތް ލިބެމުންދާނެކަމަށް އޭނާ ވިދާޅުވިއެވެ.

އޭނާ ވިދާޅުވީ، އެ އުޅަނދު ބޭނުންކުރަމުން ދަނީވެސް ކުރިން އިއުލާނު ކުރިގޮތަށް އަގުވެސް ނަގައިގެން ކަމަށެވެ.

އިމްތިޔާޒު ފަހުމީގެ ޓީމުން މިފަދަ ބައެއް މައްސަލަތައް ފާހަގަ ކުރަމުން ދިޔަނަމަވެސް، އެމްޑީޕީއާއި މަންދޫބުންގެ ގޮތުގައި ހަރަކާތްތެރިވާ ފަރާތްތަކުން ވެސް ބުނަމުންދަނީ އިންތިހާބުގެ ވޯޓުލުން ކުރިޔަށްދަނީ ރަނގަޅަށް ކަމަށެވެ.