ކުރާނެ މަސައްކަތެއް ނެތުމުން ރައްޔިތުންގެ މަޖިލީހުގެ މިއަދުގެ ޖަލްސާ ނިންމާލައިފިއެވެ.

ރައްޔިތުންގެ މަޖިލީހުގެ ދެވަނަ ދައުރުގެ ފުރަތަމަ ޖަލްސާ މިއަދު ބާއްވާފައިވާއިރު، މިއަދުގެ ޖަލްސާގައި އެޖެންޑާކޮށްފައި އޮތީ ތިމަރަފުށި ދާއިރާގެ މެންބަރު އަބްދުالله ރިޔާޒް ޓޫރިޒަމް މިނިސްޓަރު ޑރ.އަބްދުﷲ މައުސޫމާ ސުވާލު ކުރެއްވުން އެކަންޏެވެ.

މަޖިލީހުގެ ރައީސް މުޙައްމަދު ނަޝީދު މިއަދު ވިދާޅުވެފައިވަނީ އެޖެންޑާގައި އިތުރު މައްސަލައެއް ނެތް ކަމަށެވެ. އެގޮތުން ހުށައަޅާފައިވާ ބިލެއް ނެތް ކަމަށާއި އަދި ނުނިމި ހުރި މައްސަލައެއްވެސް ނެތްކަމަށް ރައީސް ނަޝީދު ވިދާޅުވިއެވެ.

މަޖިލީހުގެ މިދިޔަ ދައުރުގެ ތަފާސް ހިސާބު ދައްކާގޮތުން މަޖިލީހަށް ޖުމުލަ 131 މައްސަލައެއް ހުށަހަޅާފައިވާއިރު އޭގެ ތެރެއިން ނިމިފައި ވަނީ 65 މައްސަލައެއް ކަމަށެވެ. އެއީ 49.6 އިންސައްތައެވެ. މިދިޔަ ދައުރުގައި މަޖިލީހުގެ 35 ޖަލްސާވަނީ ބާއްވާފައެވެ.

މިއަދުގެ ޖަލްސާ ނިންމަވާލައްވަމުން މަޖިލީހުގެ ރައީސް ވިދާޅުވީ ދެން މަޖިލީހުގެ ޖަލްސާއެއް އޮންނާނީ މާދަމާ ހެނދުނު 9:00 ގައި ކަމަށެވެ.