މިދިޔަ ހޮނިހިރު ދުވަހު ބޭއްވި އެމްޑީޕީގެ އެތެރޭގެ އިންތިޚާބުގައި ވޯޓުލާފައިވަނީ 48،502 މީހުން ކަމަށް އިންތިޚާބުގެ ވަގުތީ ނަތީޖާއިން ދައްކައިފިއެވެ.

އެމްޑީޕީގެ އެތެރޭގެ އިންތިހާބު ބޭއްވީ ޗެއާޕާސަންގެ އިތުރުން، އަންހެނުންގެ ރޫޙާއި ޒުވާނުންގެ ހިތްވަރުގެ ރައީސް އާއި ނައިބު ރައީސް ހޮވުމަށެވެ. އިންތިޚާބުގެ ވަގުތީ ނަތީޖާ އެމްޑީޕީން މިހާރު ޢާއްމުކޮށްފައިވާއިރު، އިންތިޚާބުގައި ވޯޓުލާފައިވަނީ ޖުމްލަ 48،502 މީހުންނެވެ. މި އިންތިޚާބުގައި ނުވަދިހަ ހަތަރުހާހަށްވުރެ ގިނަ މީހުންނަށް ވޯޓުލުމުގެ ޙައްޤު ލިބިފައިވާކަމަށް އެމްޑީޕީން ވަނީ ބުނެފައެވެ.

އެމްޑީޕީގެ ޗެއާޕާސަން އިންތިޚާބުގައި މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީގެ މައްޗަށް އިކޮނޮމިކް މިނިސްޓަރު ފައްޔާޒު އިސްމާއިލް ވަނީ ކުރި ހޯއްދަވައި އެ އިންތިޚާބު ކާމިޔާބު ކުރަށްވާފައެވެ. ފައްޔާޒު އިސްމާއިލް އިންތިޚާބު ކާމިޔާބު ކުރެއްވީ 57 އިންސައްތަ ވޯޓް ހޯއްދަވައިގެންނެެވެ. އިންތިޚާބުގެ ވަގުތީ ނަތީޖާއިން ފައްޔާޒު ވަނީ 27،470 ވޯޓު ހޯއްދަވާފައެވެ. އޭނާ އާއި ވާދަކުރި އިންތިއަށް ލިބިލެއްވީ 20،051 ވޯޓެެވެ. އެއީ މުޅި ޖުމްލަ ވޯޓުގެ 41 އިންސައްތަ އެވެ. ޗެއަރޕާސަން އިންތިޚާބުގައި 981 ވޯޓު ވަނީ ބާތިލްވެފައެވެ.

މި އިންތިޚާބުގައި ސަފާތު އަހްމަދު ޒާހިރާއި ވާދަކޮށް، އެ ޕާޓީގެ އަންހެނުންގެ ރޫހުގެ ރައީސް ކަމަށް އިންތިހާބުވެފައިވަނީ ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒައިނާ އާދަމެވެ. ރޮޒައިނާއަށް 11،708 ވޯޓު ލިބިފައިވާއިރު ސަފާތަށް ލިބުނީ 7،961 ވޯޓެވެ. ޒުވާނުންގެ ހިތްވަރުގެ ރައީސަކަށް އިންތިހާބުވީ ރިފްގާ ޝިހާމެވެ.

އެމްޑީޕީގެ އެތެރޭގެ އިންތިޚާބަށްފަހު އެމްޑީޕީގެ ރައީސް، ރައީސް މުޙައްމަދު ނަޝީދު ވަނީ ފައްޔާޒް ހޯއްދެވި ކާމިޔާބީ ފާހަގަކުރަށްވައި، މަރުހަބާ ވިދާޅުވެފައެވެ. އެމަނިކުފާނުގެ މެސެޖުގައި ވަނީ ފަޔާއާއި ފަޔާގެ ކެމްޕޭން ޓީމަށާއި އަދި އިންތިއާއި އިންތިގެ ކެމްޕޭން ޓީމަށްވެސް ވަރަށް ބޮޑަށް މަރުހަބާ ވިދާޅުވެފައެވެ. އަދި ފަޔާގެ ޗެއަރޕާސަންކަމުގައި އެމްޑީޕީއަށް އިތުރު ކާމިޔާބީ ހޯދޭނެކަމާމެދު އެމަނިކުފާނުގެ ހިތްޕުޅުގައި ޝައްކު ނުހިނގާކަމަށް ވިދާޅުވިއެވެ.