ރައީސުލް ޖުމްހޫރިއްޔާ އިބްރާހީމް މުޙައްމަދު ޞާލިޙް، ކުރިޔަށް އޮތް 2023 ވަނަ އަހަރު އޮންނަ ރިޔާސީ އިންތިހާބުގައި ވާދަކުރައްވާނެ ކަމުގެ އިޝާރާތެއް ކުރައްވައިފިއެވެ.

އެމަނިކިފާނު މިފަދަ އިޝާރާތެއް ކުރައްވާފައިވަނީ އަލަށް އިންތިހާބުވި އެމްޑީޕީގެ ޗެއަރޕާސަން، މި ސަރުކާރުގެ އިކޮނޮމިކް މިނިސްޓަރު ފައްޔާޒު އިސްމާޢީލަށް މަރުހަބާ ދެންނެވުމަށް ކުރެއްވި ޓްވީޓެއްގައެވެ.

ހޮނިހިރު ދުވަހު އޮތް ވާދަވެރި އިންތިހާބަށްފަހު ފައްޔާޒަށް މަރުހަބާ ވިދާޅުވަމުން އެމަނިކުފާނުވަނީ ކުރިޔަށް އޮތް 2023 ވަނަ އަހަރުގެ ރިޔާސީ އިންތިހާބު ކާމިޔާބު ކުރުމުގެ އަޒުމުގައި ހުންނެވިކަން ހާމަ ކުރައްވާފައެވެ.

"މަރުހަބާ ފަޔާ! ފައްޔާޒުގެ ހިންގުންތެރި ތަޖުރިބާއާއިއެކު ޕާޓީއާއިއެކު ކުރިޔަށް ގޮސް، 2023 ކާމިޔާބު ކުރުމަށް ރަނގަޅު މިސްރާބަށް ދަތުރުކުރާނެ ކަމުގެ ޔަގީންކަން އެބައޮތް. ކުރިއަށް ކުރިއަށް، ބާރަށްކުރިއަށް." ރައީސް ޞާލިޙް ވިދާޅުވިއެވެ.

މަރްޙަބާ @faya_i . ފަޔާގެ ހިންގުމުގެ ތަޖުރިބާއާ އެކު ޕާޓީއާއެކު ކުރިއަށްގޮސް، 2023 ކާމިޔާބުކުރުމަށް ރަނގަޅު މިސްރާބަށް ދަތުރުކުރާނެ ކަމުގެ ޔަޤީންކަން އެބައޮތް . ކުރިއަށް ކުރިއަށް، ބާރަށްކުރިއަށް.@MDPSecretariat pic.twitter.com/YxzLXZLd4s

— Ibrahim Mohamed Solih (@ibusolih) May 19, 2022

މިއީ އިންތިހާބުގެ ނަތީޖާ އިއުލާނު ކުރިފަހުން، ރައީސް ޞާލިހުގެ ތާއީދާއިއެކު ވާދަކުރެއްވި ކެންޑިޑޭޓަށް އެމަނިކުފާނު ރަސްމީކޮށް މަރުހަބާ ދެންނެވި ފުރަތަމަ ފަހަރެވެ. އަދި ރިޔާސީ އިންތިހާބުގައި ވާދަކުރައްވާނެކަމުގެ އިޝާރާތެއް ކުރެއްވި ވެސް ފުރަތަމަ ފަހަރެވެ.

ޕާޓީގެ ތެރޭގައި އުފެދުނު ނުތަނަވަސް ކަމުގެ ތެރޭގައި ބޭއްވި މި އިންތިހާބުން ރައީސް ޞާލިޙްގެ ފެކްޝަން މޮޅުވުމުން، ގިނަބަޔަކު ބުނެފައިވަނީ، ކުރިޔަށް އޮތް ރިޔާސީ އިންތިހާބުގައި ރައީސް ޞާލިހް ވާދަކުރައްވަން އޮތް ފުރުސަތު އިތުރަށް ފަހިވެގެން ގޮސްފައިވާކަމަށެވެ.

ހޮނިހިރު ދުވަހު ބޭއްވި އިންތިހާބު ކާމިޔާބުކޮށް އެމްޑީޕީގެ ޗެއަރޕާސަންގެ މަގާމަށް ފައްޔާޒު އިންތިހާބުވެވަޑައިގަތީ، ބޮޑު ތަފާތަކުންނެވެ. އިންތިހާބުގައި ވޯޓް ދިން މީހުންގެ 58 ޕަސެންޓް މީހުން ވޯޓު ދީފައިވަނީ ފައްޔާޒަށެވެ. ދެން އެ އިންތިހާބުގައި ވާދަކުރި އިމްތިޔާޒު ފަހުމީ (އިންތި) އަށް ލިބިވަޑައިގަތީ 42 ޕަސެންޓް ވޯޓެވެ.