ރައްޔިތުންގެ މަޖިލީހުގެ ތަޅުމުގައި ކުރާނެ މަސައްކަތެއް ނެތުމުން މަޖިލީހުގެ މިއަދުގެ ޖަލްސާ ނިންމާލައިފިއެވެ.

ރައްޔިތުންގެ މަޖިލީހުގެ ޖަލްސާއެއް މިއަދު ބާއްވާފައިވާއިރު، މިއަދުގެ ޖަލްސާގައި ކުރިއަށް ގެންދިޔަ މަސައްކަތަކީ ފިޝަރީޒް މިނިސްޓަރު ޑރ. ހުސައިން ރަޝީދު ހަސަންއާ ސުވާލުކުރުމެވެ.

ޖަލްސާ ނިންމަވާލައްވަމުން މަޖިލީހުގެ ނައިބު ރައީސް އީވާ ޢަބްދުﷲ މިއަދު ވިދާޅުވެފައިވަނީ އެޖެންޑާގައި އިތުރު މަސައްކަތެއް ނެތް ކަމަށެވެ. ނަމަވެސް ކޮމިޓީތަކުގެ މަސައްކަތްތައް ހުރިކަން ނައިބުރައީސް ފާހަގަކުރެއްވިއެވެ.

މަޖިލީހުގެ މިދިޔަ ދައުރުގެ ތަފާސް ހިސާބު ދައްކާގޮތުން މަޖިލީހަށް ޖުމުލަ 131 މައްސަލައެއް ހުށަހަޅާފައިވާއިރު އޭގެ ތެރެއިން ނިމިފައި ވަނީ 65 މައްސަލައެއް ކަމަށެވެ. އެއީ 49.6 އިންސައްތައެވެ. މިދިޔަ ދައުރުގައި މަޖިލީހުގެ 35 ޖަލްސާވަނީ ބާއްވާފައެވެ.

މިއަދުގެ ޖަލްސާ ނިންމަވާލައްވަމުން މަޖިލީހުގެ ނައިބު ރައީސް ވިދާޅުވީ ދެން މަޖިލީހުގެ ޖަލްސާއެއް އޮންނާނީ މާދަމާ ހެނދުނު 9:00 ގައި ކަމަށެވެ.