ރައްޔިތުންގެ މަޖިލީހުގެ ތަޅުމުގައި ވަޒީރުންނާ ކުރާ ސުވާލަށް ޖަވާބު ދެއްވުމަށް ފަހު، އިތުރު ސުވާލު ކުރުމަށް މެންބަރުންނަށް ލިބޭ ވަގުތު 30 މިނިޓަށް އިތުރު ކުރަން އާންމު ކޮމިޓީން މިއަދު ފާސްކޮށްފި އެވެ.

މަޖިލީހުގެ ތަޅުމުގައި ވަޒީރުންނާ އިތުރު ސުވާލު ކުރުމަށް އެކަށީގެންވާ ވަގުތު ނުލިބޭ ކަމަށްބުނެ މެންބަރުން ޝަކުވާ ކުރަށްވާތީ، މިކަމަށް ހައްލެއް ހޯދުމަށް މަޖިލީހުގެ ރައީސް މުހައްމަދު ނަޝީދު ވަނީ އާންމު ކޮމިޓީގައި އެދިވަޑައިގެންފަ އެވެ.

އެކަމާގުޅިގެން މިއަދު ކުރިއަށްދިޔަ އާއްމު ކޮމިޓީގެ ބައްދަލުވުމުގައި މަޖިލީހުގެ ގަވައިދަށް އިސްލާހު ގެންނަން ވަނީ ފާސްކޮށްފައެވެ. އެގޮތުން މެމްބަރުން ނިންމީ ވަޒީރުގެ އިއުތިރާޒެއް ނެތް ނަމަ އިތުރު ސުވާލުކުރުން 30 މިނިޓަށް ބަދަލު ކުރުމަށެވެ.

އަލިފުށީ ދާއިރާގެ މެންބަރު މުހައްމަދު ރަޝީދު ހުސައިން (ބިގޭ) ހުށަހަޅުއްވައި ފުނަދޫ ދާއިރާގެ މެންބަރު މުހައްމަދު ޝާހިދު ތާޢީދުކުރެއްވި އިސްލާޙު ފާސްވެފައިވަނީ ކޮމިޓީގެ މިއަދުގެ ބައްދަލުވުމުގައި ބައިވެރިވެވަޑައިގެންނެވި މެމްބަރުންގެ އިއްތިފާގުންނެވެ.

މަޖިލީހުގެ ގަވައިދުގައި މިހާރު އޮންނަ ގޮތުން މައިގަނޑު ސުވާލަށް ޖަވާބުދިނުމަށްފަހު، ވަޒީރާ ސުވާލު ކުރުމުގެ ފުރުސަތު ލިބޭނީ 20 މިނިޓް ވަންދެންނެވެ.