ޖަރުމަނުވިލާތަށް، ދިވެހިރާއްޖެއިން ކަނޑައަޅާ ސަފީރު ކަމަށް އައިޝަތު ޝާން ޝާކިރު އައްޔަން ކުރަން ފެންނަ ކަމަށް ރައްޔިތުންގެ މަޖިލީހުން ފާސްކޮށްފި އެވެ.

އައިޝަތު ޝާން ޝާކިރު އެ މަގާމަށް އައްޔަން ކުރަން ސަރުކާރުން ރައްޔިތުންގެ މަޖިލީހަށް ފޮނުވާފައިވަނީ މިދިޔަ މަހުގެ 25 ވަނަ ދުވަހު އެވެ. ޖަރުމަނުގެ ސަފީރުކަމުގެ މަގާމުގައި 2019 އިން ފެށިގެން ހުންނެވި އަހުމަދު ލަތީފް މިހާރު ވަނީ ފޮރިން ސެކްރެޓަރީގެ މަގާމަށް އައްޔަން ކުރައްވާފައެވެ.

މިއަދު އޮތް ރައްޔިތުންގެ މަޖިލީހުގެ 2022 ވަނަ އަހަރުގެ ދެވަނަ ދައުރުގެ 5 ވަނަ ޖަލްސާގައި ޖަރުމަނުވިލާތަށް، ދިވެހިރާއްޖެއިން ކަނޑައަޅާ ސަފީރު ކަމަށް ޝާން އައްޔަނުކުރަން ފެންނަ ކަމަށް 29 މެމްބަރުން ވަނީ ވޯޓު ދެއްވާފަ އެވެ.

އައިޝަތު ޝާން ޝާކިރަކީ ފޮރިން މިނިސްޓްރީގެ ޗީފް އޮފް ޕްރޮޓޮކޯލެވެ. 2020 ވަނަ އަހަރު އެ މަގާމަށް އޭނާ އައްޔަން ކުރިއިރު އެއީ ރާއްޖޭގެ ފުރަތަމަ އަންހެން ޕްރޮޓޮކޯލްކަން ފާހަގަކޮށްލެވެއެވެ.

މީގެ ކުރިން އޭނާ ވަނީ ބަންގްލަދޭޝްއަށް ކަނޑައަޅާފައި ހުންނަވާ ދިވެހި ސަފީރު ކަމާއި ފޮރިން މިނިސްޓްރީގެ ޖޮއިންޓް ސެކްރެޓަރީކަން ވެސް ކުރައްވާފައެވެ.