ރައީސް އަބްދުﷲ ޔާމީންގެ ވެރިކަމުގައި ހުޅުމާލޭގައި އިމާރާތްކުރަން ފެށި ވިނަރެސް ފްލެޓްތަކުގެ މަސައްކަތް އަންނަ ޖުލައި މަހަށް ނިންމައި ހައުސިން ޑިވެލޮޕްމަންޓް ކޯޕަރޭޝަން، އެޗްޑީސީއާ ހަވާލުކުރާނެ ކަމަށް ހައުސިން މިނިސްޓަރ މުޙައްމަދު އަސްލަމް މިއަދު ވިދާޅުވެއްޖެއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި މެންބަރުން ކުރެއްވި ސުވާލުތަކަށް ޖަވާބު ދެއްވަމުން މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ މުޙައްމަދު އަސްލަމް ވިދާޅުވީ ހުޅުމާލޭގައި އެންމެ އަވަހަށް މީހުން ވަންނާނީ މިހާރު މަސައްކަތް ނިމެމުން އަންނަ ވިނަރެސް ފްލެޓްތަކަށް ކަމަށެވެ. އަދި އެ ފްލެޓްތަކުގެ ބޮޑު އިންސައްތައެއް ލިބޭނީ މާލޭ ރައްޔިތުންނަށް ކަމަށް އަސްލަމް ވިދާޅުވިއެވެ.

މިނިސްޓަރ މިއަދު ވިދާޅުވީ މާލޭގެ ރައްޔިތުންނަށް ބޯހިޔާވެހިކަން ފޯރުކޮށްދިނުމަށް ސަރުކާރުން ވެފައިވާ ވައުދާއި އެއްގޮތަށް އަންނަ މަހު 1000 ފްލެޓަށް އިއުލާން ކުރާނެ ކަމަށެވެ. އަދި މާލޭގެ ރައްޔިތުންނަށް ރައީސުލްޖުމްހޫރިއްޔާ ވެފައިވާ ވައުދާއި އެއްގޮތަށް މާލޭގެ ރައްޔިތުންގެ ބޯހިޔާ ވަހިކަމުގެ މައްސަލަ ހައްލު ވެގެންދާނެކަމަށް މިނިސްޓަރ އަސްލަމް ވިދާޅުވިއެވެ. އެގޮތުން ހުޅުމާލެއިން ޚާއްސަކުރާ 1000 ގޯތި ދޭނެ ސަރަހައްދު އެޗްޑީސީން ވަނީ ކަނޑައަޅާފައިކަމަށް އަސްލަމް ވިދާޅުވިއެވެ.

މީގެ ކުރިން ސަރުކާރުން ބުނެފައިވަނީ ވިނަރެސް ފްލެޓްތައް ދިނުމަށް ކަނޑައަޅާފައިވަނީ ހިޔާ ފްލެޓް ދޫކޮށްލި 76 ފަރާތަކާއި ގުޅީފަޅުން ފްލެޓް ދޫކޮށްލި 91 ފަރާތައް ކަމަށެވެ. މީގެއިތުރުން ސީލައިފުން ފްލެޓް ގަތުމަށް ފައިސާ ދެއްކި ފަރާތްތަކުގެ ތެރެއިން އެޗްޑީސީން އެ ފައިސާ ރީފަންޑު ކޮށްދީފައިވާ ފަރާތްތަކަށް، ވިނަރެސް މަޝްރޫއުގެ ތެރެއިން ފްލެޓް ގަތުމަށް ވަނީ ފުރުސަތު ހުޅުވާލާފައެވެ.

ހައުސިންގ މިނިސްޓްރީން ބުނީ ކަނޑައަޅާފައިވާ ފަރާތްތަކަށް ފްލެޓް ދިނުމުންވެސް، ބާކީ ގިނަ އަދަދެއްގެ ފްލެޓް ހުންނާނެކަމަށެވެ. އަދި ބާކީ ހުރި ފްލެޓްތައް ގަނެވޭނީ މާލޭގެ ރައްޔިތުންނަށް ކަމަށް ޕްލޭނިން މިނިސްޓަރު މުހައްމަދު އަސްލަމް ވަނީ މީގެ ކުރިން އެޗްޑީސީއަށް އަންގާފައިކަމަށް މައުލޫމާތު ލިބިފައިވެއެވެ. ނަމަވެސް ފްލެޓްތައް ވިއްކަން ހުޅުވާލާ ތާރީހެއް އެޗްޑީސީން އަދި މިހާތަނަށް ހާމަކޮށްފައެއް ނުވެއެވެ.

ވިނަރެސް އެޕާޓްމަންޓްތަކުގައި 3 ކޮޓަރީގެ ތަންތަނުގެ ބޮޑުމިނަކީ 902 އާއި 883 އަކަފޫޓެވެ. ވިނަރެސް މަޝްރޫއުގައި 13 ބުރީގެ 10 ޓަވަރުގައި 1،344 ފްލެޓް ހިމެނޭއިރު އެ ހުރިހާ އެޕާޓްމެންޓެއްގައިވެސް ތިން ކޮޓަރިއާއި ތިން ފާހާނާ އަދި ބެލްކަންޏެއް ހިމެނެއެވެ.

ވިނަރެސް ފްލެޓްތަކުގައި ހިމެނޭ މެރީނާ ވިއު ފްލެޓްތަކުގައި ހިމެނެނީ 172 އެޕާޓްމަންޓެވެ. މި ޔުނިޓްތަކުގެ އަގު އުޅެނީ 2.7 މިލިއަން ރުފިޔާއާ 2.6 މިލިއަން ރުފިޔާއާ ދެމެދުގައެވެ. އައުޓާ ވިއުގައި 372 އެޕާޓްމެންޓް ހިމެނޭއިރު އެތަންތަނުގެ އަގަކީ 2.7 މިލިއަން ރުފިޔާއާ 2.6 މިލިއަން ރުފިޔާއާ ދެމެދުގެ އަގުތަކެކެވެ. އިނާ ވިއުގައި ހިމެނެނީ 352 އެޕާޓްމަންޓެވެ. މި ޔުނިޓްތަކުގެ އަގު އުޅެނީ 2.6 މިލިއަން ރުފިޔާގައެވެ. މީގެއިތުރުން ސްޓޭންޑާޑް ވިއުގައި 448 އެޕާޓްމެންޓް ހިމެނޭއިރު މި ޔުނިޓްތައް ވިއްކާ އަގަކީ 2.5 މިލިއަން ރުފިޔާއެވެ.