ރީތީ ތެދު ކަމަށާއި މަޝްރޫޢުތައް ކުރިއަށް ގެންދިއުމުގައި ދިމާވާ ގޮޮންޖެހުންތަކުގެ ވާހަކަތައްވެސް ދެއްކޭ ކަމަށް މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ މުޙައްމަދު އަސްލަމް ވިދާޅުވެއްޖެއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި މެންބަރުން ކުރެއްވި ސުވާލުތަކަށް ޖަވާބު ދެއްވަމުން ހައުސިންގ މިނިސްޓަރ އަސްލަމް ވިދާޅުވީ ތެދު އެއީ އެންމެ ރީތި ގޮތްކަމަށާއި ސަރުކާރުގެ މަޝްރޫޢުތައް ކުރިއަށް ގެންދިއުމުގައި ދިމާވާ ގޮޮންޖެހުންތަކުގެ ވާހަކަތައްވެސް ދައްކާކަމަށެވެ. އަދި ވަޢުދުވަނީ ފުއްދުމުގެ ނިޔަތުގައިކަމަށްވެސް އަސްލަމް ވިދާޅުވިއެވެ.

ސަރުކާރުގެ ވުޒާރާތަކުން ކެނޑިނޭޅި މަސައްކަތް ކުރައްވަމުން ގެންދަނީ ސަރުކާރުންނާއި ރައީސް ސާލިޙު ވެވަޑައިގެންފައިވާ ވައުދުފުޅުތައް ފުއްދަވައިދެއްވުމަށް ކަމަށާއި ނަމަވެސް ތެދުބަހުން ސާފުކޮށް މަޖިލީހުގައި ދެއްކެވި ވާހަކަފުޅު ތަފާތު އެކި ގޮތްގޮތަށް މީހުން ދައްކަމުން ގެންދާ ކަމަށް މިނިސްޓަރ ވިދާޅުވިއެވެ.

"ތެދު އެއީ އެންމެ ރީތި ގޮތް. ތެދު ރީތި. އަޅުގަނޑު ކުރީދުވަހު މިތަނުގައި ދެއްކި ވާހަކަ އެކިގޮތްގޮތަށް ޓިކްޓޮކްގައި އުޅޭކަންވެސް އަޅުގަނޑަށް އެނގޭ." މިނިސްޓަރ އަސްލަމް މިއަދު ވިދާޅުވިއެވެ.

މިނިސްޓަރ މިއަދުވަނީ ލޭންޑް ޔޫސް ޕްލޭންގެ މައްސަލާގައިވެސް މަޖިލީހުގައި ވާހަކަފުޅު ދައްކަވާފައެވެ. އެގޮތުން ޕްލޭނިންގ މިނިސްޓްރީގެ ޒިންމާއަކީ ރަށްރަށުން ލޭންޑް ޔޫސް ޕްލޭން ހުށައެޅުމުން އެ ޕްލޭން ބަލައި، ފާސް ކުރުން ކަމަށާއި އިތުރަށް މިނިސްޓްރީން ދޭންޖެހޭ ހުއްދައެއް ނޯންނާނެކަމަށް އަސްލަމް ވިދާޅުވިއެވެ.

މަޖިލީހުގައި މިދިޔަ މޭމަހުގެ 25 ވަނަ ދުވަހު ބޭއްވި ޖަލްސާގައި ހައުސިންގ މިނިސްޓަރ އަސްލަމް ވިދާޅުވީ، މަޖިލީހުގައިވެސް ތިއްބެވީ ސިޔާސީ ބޭފުޅުން ކަމަށާއި، ނަމަވެސް މަޤާމަށް ވަޑައިގަތުމަށް ވެވަޑައިގަންނަވާ ހުރިހާ ވަޢުދެއްގެ ތެރެއިން ދައުރު ނިމޭއިރުވެސް ނުފުއްދޭ ވަޢުދު ހުންނަކަމަށެވެ. އެއީ ޙާލަތާގުޅިގެން ކުރިމަތިވާ ކަމެއްކަމަށްވެސް މިނިސްޓަރ އަސްލަމް ވިދާޅުވިއެވެ. ނަމަވެސް ވަޢުދު ފުއްދަން އެންމެންވެސް މަސައްކަތް ކުރާކަމަށް އަސްލަމް ވަނީ ވިދާޅުވެފައެވެ.