ރާއްޖޭގެ ދަރަނި ރީސްޓްރަކްޗާ ނުކޮށްފިނަމަ ރާއްޖެއަށް ތަކްލީފް ބޮޑުވެދާނެ ކަމަށް ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ވިދާޅުވެއްޖެއެވެ.

ދަޢުލަތުގެ މާލީ ވުޒާރާގެ ތަފާސް ހިސާބުތަކުން ދައްކާގޮތުގައި މިއަހަރުގެ ފުރަތަމަ ތިން މަހު ނެގި ދަރަންޏާއެކު ދައުލަތުގެ ދަރަނި ވަނީ 99 ބިލިއަން ރުފިޔާއަށް އަރާފައެވެ.

އެކަމާގުޅިގެން ރައްޔިތުންގެ މަޖިލީހުގެ އެމްޑީޕީ ޕާލިމެންޓްރީ ގްރޫޕްގެ މެންބަރުން ތިއްބަވާ ވަޓްސްއެޕް ގްރޫޕަށް ރޭ ފޮނުއްވެވި މެސެޖުތަކެއްގައި ރައީސް ނަޝީދު ވިދާޅުވީ، އަންނަ މަހު ދައުލަތުގެ ރިޒާވް ނުރައްކާވާ މިންވަރަކަށް ދަށްވެދާނެ ކަމަށް ލަފާކުރެވޭ ކަމަށެވެ. އަދި 2019 ވަނަ އަހަރާއި 2020 ވަނަ އަހަރުވެސް ރާއްޖޭގެ ދަރަނި ރީސްޓްރަކްޗާ ކުރުމުގެ މުހިއްމުކަމުގެ ވާހަކަ އެމަނިކުފާނު ވާނީ ދައްކަވާފައި ކަމަށް ރައީސް ނަޝީދު ވިދާޅުވިއެވެ.

އެވާހަކަ އެގޮތަށް ދެއްކެވީ ދަރަނިތައް ރީސްޓްރަކްޗަރ ނުކޮށް، ބޮންޑު ވިއްކާނަމަ އޭގެ ތަކުލީފާއި ފަހުން ކުރިމަތިވާނެކަން އެނގިވަޑައިގަންނަވާތީ ކަމަށް ރައީސް ނަޝީދު ވިދާޅުވިއެވެ. އެގޮތުން މިއަހަރާއި އަންނަ އަހަރުވެސް، ދަރަނި އަދާކުރަން އުނދަގޫވާނެ ކަމަށާއި، ކުރިއަށް އޮތް މަސްތަކުގައި ދައުލަތުގެ ދަރަންޏާއި، ދަރަނި ދެއްކުމަށް ފައިސާ ހޯދާ ގޮތެއް މަޖިލީހުގެ މާލިއްޔަތު ކޮމިޓީއިން ސާފުކުރުން ވަރަށް މުހިންމު ކަމަށް ރައީސް ނަޝީދު ވިދާޅުވިއެވެ.

މާލީ ވުޒާރާއިން އާންމުކޮށްފައިވާ ތަފާސް ހިސާބުތަކުން ދައްކާ ގޮތުގައި، މިދިޔަ އަހަރުގެ ފަހު ކުއާޓާއާއި އަޅާބަލާއިރު މިއަހަރުގެ ފުރަތަމަ ކުއާޓާގައި ދައުލަތުގެ ދަރަނި ވަނީ 4.3 ބިލިއަން ރުފިޔާއަށް އިތުރުވެފައެވެ. އަދި އެ މުއްދަތުގެ ތެރޭގައި ދައުލަތުން 4.8 ބިލިއަން ރުފިޔާގެ އިތުރު ލޯނު ނަގައިފައިވެއެވެ.

ދައުލަތުގެ ދަރަނި 99 ބިލިއަނަށް އަރާފައިވާއިރު ސޮވެރިން ގެރެންޓީއާއި ނުލައި ދަރަނި ހުރީ 85 ބިލިއަން ރުފިޔާގައެވެ. މީގެ ތެރޭގައި ހިމެނެނީ އެތެރޭގެ 52 ބިލިއަން ރުފިޔާގެ ދަރަންޏާއި ބޭރުގެ 33 ބިލިއަން ރުފިޔާގެ ދަރަންޏެވެ.