ކީރިތި ރަސޫލާއަށް ފުރައްސާރަކޮށް އިންޑިއާގެ ބީޖޭޕީގެ ތަރުޖަމާނު ދެއްކި ވާހަކަ، ދިވެހި ސަރުކާރުން ކުށްވެރިކޮށްފައިނުވާތީ އެކަން ސަރުކާރުގެ ސަމާލުކަމަށް ގެނައުމަށް ރައްޔިތުންގެ މަޖިލީހަށް ހުށަހެޅި ކުއްލި މައްސަލަ ބޭރުކޮށްލައިފިއެވެ.

މި މައްސަލަ މަޖިލީހަށް ހުށަހަޅުއްވާފައިވަނީ މަޑުއްވަރީ ދާއިރާގެ މެންބަރު އާދަމް ޝަރީފް އުމަރެވެ.

އާދަމް ޝަރީފް ހުށަހެޅުއްވި މައްސަލައިގައި ބުނެފައި ވަނީ ރަސޫލާއަށް ފުރައްސާރަކުރުންފަދަ ދަށު ދަރަޖައިގެ އަމަލު ހިންގުމުން މުސްލިމުން ނުހަނު ކަންބޮޑުވެފައިވާ މި ދަނޑިވަޅުގައި، ދިވެހި ސަރުކާރުން މި ހައްސާސް ދަނޑިވަޅުގައި އެއްވެސް ފިޔަވަޅެއް އަޅާފައިނުވާކަމަށެވެ. އަދި ކީރިތި ގުރުއާނަށާއި ރަސޫލާއަށް ފުރައްސާރަ ކޮށްފައިވާ މައްސަލަ ހަރުކަށި އިބާރާތުން ކުށްވެރިކުރާ ހާލުގައި، ސަރުކާރުން މި ކަމާމެދު ފިޔަަވަޅު އަޅާފައިނުވާ މައްސަލަ ކުށްވެރިކޮށް، އެކަން ދިވެހި ސަރުކާރުގެ ސަމާލުކަމަށް ގެނައުމަށް މި މައްސަލައިގައި ގޮވާލާފައިވެއެވެ.

މި މައްސަލަ މަޖިލީހަށް ބަލައި ގަތުމަށް ވޯޓަށް އެހުމުން މައްސަލަ ބަލައިގަތުމަށް ވޯޓް ދެއްވީ 10 މެމްބަރުންނެވެ. 33 މެންބަރުން ވަނީ މައްސަލަ ބަލައިނުގަތުމަށް ވޯޓް ދެއްވާފައެވެ.

ބީޖޭޕީގެ ތަރުޖަމާނު ދެއްކި ވާހަކަތައް ރާއްޖޭގެ ބައެއް ސިޔާސީ ޕާޓީތަކުންނާއި ދީނީ އިލްމުވެރިން އަންނަނި ކުއްވެރިކުރަމުންނެވެ.