ހިޔާ ފްލެޓްތަކަށް ކުލި ނުދައްކާ ފަރާތްތަކުން ޖޫރިމަނާއާއެކު ކުލީގެ ފައިސާ ދެއްކުމަށް ހައުސިންގ ޑިވެލޮޕްމަންޓް ކޯޕަރޭޝަން، އެޗް.ޑީ.ސީން އަންގަން ފަށައިފިއެވެ.

ހިޔާ ފްލެޓްތައް ލިބުނު ފަރާތްތަކާއެކު ވެފައިވާ އެއްބަސްވުމާއި އެއްގޮތަށް މި ފްލެޓްތަކުން އެޗް.ޑީ.ސީން ކުލި ނަގަން ފަށާފައިވަނީ މިދިޔަ އޭޕްރީލްމަހުން ފެށިގެންނެވެ. އެޗްޑީސީން މިހާރު ދަނީ އެއްބަސްވުމާއި އެއްގޮތަށް ކުލި ނުދައްކާ ފަރާތްތަކެއް ހިޔާ ފްލެޓްތަކުގައި އުޅެމުންދާތީ، އެފަރާތްތަކަށް ފުރަތަމަ ޕޭމަންޓް އެޑްވައިސް ފޮނުވަމުންނެވެ.

އެޗް.ޑީ.ސީން ފޮނުވާފައިވާ ޕޭމަންޓު އެޑްވައިސްގައިވާ ގޮތުން އެއްބަސްވުމާއި އެއްގޮތަށް މިހާތަނަށް ދައްކާފައިނުވާ ފައިސާ އެ ލިޔުން ހަވާލުކުރާތާ 30 ދުވަހުގެ ތެރޭގައި ދެއްކުމަށް ވަނީ އަންގާފައެވެ. އެޗްޑީސީން ހިޔާ ފްލެޓްތަކުން އޭޕްރީލްމަހު ކުލި ނަގަން ފަށާފައިވަނީ 3 ފަހަރެއްގެ މަތިން ކުލި ދެއްކުމުގެ މުއްދަތު އިތުރު ކޮށްދިނުމަށްފަހުއެވެ.

ހިޔާ ފްލެޓްގެ ކުލީގެ ގޮތުގައި ސަރުކާރުން ކަނޑައަޅާފައިވަނީ 7500 ރުފިޔާއެވެ. އަދި މެއިންޓަނަންސް ފީގެ ގޮތުގައި އިތުރު 1000 ރުފިޔާއާއެކު، ފްލެޓްތަކުގެ ވެރިން މަހަކު 8500 ރުފިޔާ އެޗް.ޑީ.ސީއަށް ދައްކަން ޖެހޭނެއެވެ.