ކޯވިޑާއި ގުޅިގެން 2 އަހަރެއްހާ ދުވަސްވަންދެން ބޯޑަރު ބަންދުކޮށްފައި އޮތުމަށްފަހު ހަރުކަށި ފިޔަވަޅުތަކަކާއެކު ފަތުރުވެރިންނަށް ޖަޕާން ހުޅުވާލައިފިއެވެ.

ހުކުރުދުވަހުން ފެށިގެން ބޭރުގެ ފަތުރުވެރިންނަށް ޖަޕާނު ހުޅުވާލާފައިވާއިރު، ފަތުރުވެރިން އަމަލުކުރުމަށް ގިނަ އުސޫލުތަކެއް ވަނީ އެކުލަވާލާފައެވެ.

ޖަޕާނުން ކަނޑައަޅާފައިވާ އުސޫލުތަކުގެ ތެރޭގައި މާސްކު އެޅުން މަޖުބޫރުކުރުމާއި، މެޑިކަލް އިންޝުއަރެންސް ހަމަޖެއްސުން ހިމެނެއެވެ. މީގެއިތުރުން ޕެކޭޖް ޓުއަރތައް ނަގައިގެން ނޫނީ ފަތުރުވެރިންނަށް ނާދެވޭނެއެވެ. އަދި ފަތުރުވެރިން ބޭރުގައި އުޅޭ ހުރިހާ ވަގުތެއްގައިވެސް ޓުއަރ ގައިޑެއް ހުންނަންޖެހޭނެއެވެ.

ފަތުރުވެރިން ގެންނަ ޓުއަރ އެޖެންސީތަކުން ފަތުރުވެރިން މި އުސޫލުތަކަށް ތަބާވޭތޯ ޔަގީންކުރަންޖެހޭނެކަމަށް ޖަޕާނުގެ ޓުއަރިޒަމް އެޖެންސީން ބުނެއެވެ.

ޖަޕާނުގައި މާސްކު އެޅުމަށް ލުއިތަކެއް ދީފައިވީނަމަވެސް، ބޭރުން އަންނަ ފަތުރުވެރިން އާއްމު ތަންތަނުގައި އުޅޭއިރު، މާސްކު އަޅައިގެން ހުރުން މަޖޫބޫރުވާނެއެވެ. އަދި ބަންދު ތަންތަނުގައިވެސް އެހެން މީހުންނާއެކު ތިބޭނަމަ މާސްކު އެޅުން މަޖުބޫރުވާނެއެވެ.

ޖަޕާނުގެ ޓޫރިޒަމް މިނިސްޓްރީން ބުނީ ކަނޑައަޅާފައިވާ އުސޫލުތަކަށް ހުރިހާ ފަރާތަކުންވެސް އަމަލުކުރާނަމަ މަޑުމަޑުން ޓޫރިޒަމް ހަމައަކަށް އެޅި، އިތުރު ފަތުރުވެރިންނަށް ފުރުސަތު ލިބޭނެކަމަށެވެ. ޖަޕާނުން މިހާރު ކަނޑައަޅާފައި އޮތީ ދުވަހަކު 20000 ފަތުރުވެރިންނަށް ފުރުސަތު ދިނުމަށެވެ.

ފަތުރުވެރިންގެ ގޮތުގައި ޖަޕާނަށް އެތެރެވެވޭނީ ޖަޕާނުން ކަނޑައަޅާފައިވާ "ލޯ ރިސްކު" ނުވަތަ "ބުލޫ ލިސްޓް" ގައި ހިމެނޭ ގައުމުތަކުގެ ފަތުރުވެރިންނަށް އެކަންޏެވެ. 98 ގައުމެއް ހިމެނޭ މި ލިސްޓުގައި އެމެރިކާ، ޔޫކޭ، އޮސްޓްރޭލިޔާ، ޗައިނާ، ދެކުނު ކޮރެޔާ، ތައިލެންޑު އަދި އިންޑޮނޭޝިޔާ ހިމެނެއެވެ. މި ލިސްޓުގައި ރާއްޖެއެއް ނުހިމެނެއެވެ.

ޖަޕާނުން މިދިޔަމަހު ފަތުރުވެރިން ގެނައުމަށް "ޓެސްޓް ޓުއަރ"ތަކެއްވެސް ވަނީ ބަާއްވާފައެވެ. 50 މީހުން ހިމެނުނު އެ ގްރޫޕްގެ ތެރެއިން ޕޮޒިޓިވްވީ އެންމެ މީހެކެވެ.

މި ދަތުރުގައި ބައިވެރިވި ޓްރެވަލް އޭޖެންޓެއް ބުނީ ޖަޕާނުން ކަނޑައަޅާފައިވާ އުސޫލުތަކުގެ ސަބަބުން ޖަޕާނަށް ދަތުރުކުރަން ބޭނުންވާ މީހުންގެ އަދަދު ކުރިއަށްއޮތްތަނުގައި މަދުވެދާނެކަމަށެވެ.

"ބަންދުވެފައި ހުންނަ ތަނެއްގައި މާސްކު އަޅަން ފަތުރުވެރިން އެއްބަސްވެދާނެ. އެކަމަކު 24 ގަޑިއިރު މާސްކު އަޅައިގެން އުޅެން ފަތުރުވެރިންނަށް އުނދަގޫވާނެ. އަދި މުޅި ދަތުރުގައި ޓުއަރ ގައިޑެއް ގެންގުޅެން ޖެހުމަކީ ހަރަދު ބޮޑުވާނެކަމެއް. އެހެންވީމަ ގިނަ ފަތުރުވެރިން ދަތުރު ފަސްކުރުމަކީ ގާތްކަމެއް" އޮސްޓްރޭލިއާގެ ޓުއަރ ގައިޑް ބުންޏެވެ.

ކޯވިޑްގެ ކުރިން 2019 ވަނަ އަހަރު ޖަޕާނަށް 32 މިލިއަން ފަތުރުވެރިން ޒިޔާރަތްކުރިއެވެ. އަދި އެ ފަތުރުވެރިން ގާތްގަނޑަކަށް 36.28 ބިލިއަން ޑޮލަރު ޖަޕާނުގައި ހޭދަކުރިއެެވެ.

ޖަޕާނުން ވަނީ 2030 ވަނަ އަހަރު އަންނަންވާއިރަށް އަހަރަކު 60 މިލިއަން ފަތުރުވެރިން ގެނައުމުގެ އަމާޒެއް ކަނޑައަޅާފައެވެ.