ސަރުކާރުގެ ގިނަ ވުޒާރާތަކެއް ހިންގަމުންގެންދާ ވެލާނާގޭ ޕާކިންގ ސަރަޙައްދުގައި އޮތް ތިން ކާރެއްގައި "އިންޑިއާ އައުޓް" ސްޕްރޭކޮށްފި އެވެ.

މި ކާރުތަކަކީ ދަޢުލަތުގެ "ޖީ ބޯޑު" ޖަހާފައިވާ ކާރުތަކެކެވެ. އެހެންކަމުން މިއީ ދަޢުލަތުގެ ބައެއް ވަޒީރުންގެ ކާރުތަކެއް ކަމަށް ބެލެވެއެވެ. ކާރުތަކުގައި ނޫކުލައިގެ ސްޕްރޭއިން "އިންޑިއާ އައުޓް" ޖަހާފައިވާ ފޮޓޯތައް ސޯޝަލް މީޑިއާގައި ދަނީ ދައުރުވަމުންނެވެ.



އިދިކޮޅު ފަރާތްތަކުން މިހާރު ކުރިއަށްގެންދާ "އިންޑިއާ އައުޓް" ޙަރަކާތުގެ ދަށުން ރައްޔިތުންގެ މަޖިލީހުގެ ރައީސް މުޙައްމަދު ނަޝީދުގެ އާއިލީ ގޭގެ ފާރަށްވެސް "އިންޑިއާ އައުޓް" ވަނީ ސްޕްރޭކޮށްފައެވެ. އަދި ދަޢުލަތުގެ އިސްވެރިންގެ ގެތަކުގެ ފާރުގައިވެސް އެ ޢިބާރާތް ސްޕްރޭ ކޮށްފައިވެއެވެ.

ރާއްޖޭގައި ތިބި އިންޑިޔާ ސިފައިން ބޭލުމަށް ގޮވާލާ އިދިކޮޅުން ކުރިއަށް ގެންދާ އިންޑިއާއާ ދެކޮޅު ހަރަކާތަކީ ގައުމީ ސަލާމަތަށް ހުރި ނުރައްކަލެއް ކަމަށް ގައުމީ ސަލާމަތާއި ބެހޭ މަޖިލީހުން ކަނޑައެޅުމުން ރައީސް އިބްރާހީމް މުހައްމަދު ސޯލިހު ނެރުއްވި ރިޔާސީ ގަރާރަކުން ވަނީ އެހަރަކާތް ހުއްޓުވުމަށް ފުލުހުންނަށް އަންގަވާފައެވެ. އަދި އޭގެ ފަހުން ފުލުހުން ގެންދަނީ އެހަރަކާތް ހުއްޓުވައި ގިނަ ބަޔަކު ހައްޔަރު ވެސް ކުރަމުންނެވެ. އެގޮތުން އިންޑިއާ އައުޓް ޖަހާފައިވާ ދިދައާއި ބެނާ ފަދަ ތަކެތި އާންމުކޮށް ގެންގުޅޭނަމަ ފުހުން ދަނީ އެތަކެތި އަތުލައި އަދި ފިޔަވަޅު ވެސް އަޅަމުންނެވެ.

ނަމަވެސް ކުރީގެ ރައީސް ޔާމިން އަބްދުލްގައްޔޫމުގެ ގެކޮޅުގައި ދަމާފައި ހުރި ބޮޑު ބެނާއެއް ކޯޓު އަމުރެއް ހޯދައިގެން ފުލުހުން ނެގި މައްސަލަ ހައިކޯޓުގައި އިސްތިއުނާފު ކުރުމުން އެކޯޓުން ނިންމި ނިންމުމާއެކު އެކަމުގައި ބޮޑެތި ގާނޫނީ ސުވާލު ތަކެއް ވަނީ އުފެދިފައެވެ.