އެކި ދާއިރާތަކުން ކުރަންޖެހޭ ދިރާސާތައް ވިލާ ކޮލެޖާއި އެމްޑަބްލިއުއެސްސީން ގުޅިގެން ކުރިއަށް ގެންދިއުމުގެ އެއްބަސްވުމެއްގައި މިއަދު ސޮއިކޮށްފިއެވެ.

އެމްޑަބްލިޔުއެސްސީގައި މިއަދު ބޭއްވި ރަސްމިއްޔާތުގައި މި އެއްބަސްވުމުގައި އެ ކުންފުނީގެ ފަރާތުން ސޮއިކުރެއްވީ ކުންފުނީގެ މެނޭޖިން ޑިރެކްޓަރު އަދި ސީއީއޯ ހަސަން ޝާހެވެ. ވިލާ ކޮލެޖުގެ ފަރާތުން ސޮއިކުރެއްވީ ކޮލެޖުގެ ރެކްޓަރު ޑރ. އަހުމަދު އަންވަރެވެ.

މއަދު ސޮއިކުރެވުނު މިފަހުމުނާމާގެ ދަށުން، ދެ ފަރާތުން ބޭނުންވާ ދާއިރާތަކުން ދިރާސާ ކުރުމަށްޓަކައި އެއްބާރުލުންދިނުމާއި، މަޢުލޫމާތު ފޯރުކޮށްދިނުމުގެ އިތުރުން ތަމްރީންތައް ދިނުމަށް އެހީތެރިކަން ފޯރުކޮށްދިނުމަށް ވަނީ ހަމަޖެހިފައެވެ.

އަދި މިފަހުމުނާމާގެ ދަށުން، އެމް.ޑަބްލިޔު.އެސް.ސީ އާއި ގުޅުންހުރި ދާއިރާތައް ދިރާސާކުރުމަށް ޝައުގުވެރިވެލައްވާ ދަރިވަރުންނަށް ވިލާ ކޮލެޖް މެދުވެރިކޮށް ފުޅާދާއިރާއެއްގައި ދިރާސާތައްކޮށް ހޭލުންތެރިކޮށް އެކަމުގެ މަޢުލޫމާތު ބޭނުންވާ ފަރާތްތަކަށް ފޯރުކޮށް ދިނުމަށް މަގު ފަހިވެގެންދާނެ ކަމަށް އެމް.ޑަބްލިޔު.އެސް.ސީން މަޢުލޫމާތު ދީފައިވެއެވެ.

އެމް.ޑަބްލިޔު.އެސް.ސީން ބުނީ އެކުންފުނީގެ އުންމީދަކީ މިފަހުމުނާމާގެ ސަބަބުން ރާއްޖޭގެ ދިރާސާކުރުމުގެ ދާއިރާ އިތުރަށް ފުޅާވެ ތަރައްޤީވެ، ރައްޔތުންގެ މެދުގައި ހޭލުންތެރިކަން އިތުރުވެގެން ދިއުން ކަމަށެވެ. ހަމައެއާއެކު، ޢިލްމީ ހޯދުންތައް ހޯދުމުގައި އައު ގޮތްތައް ތައާރަފް ވެގެންދިއުމަކީ އެކުންފުނީގެ އުންމީދެއް ކަމަށްވެސް އެމްޑަބްލިއުއެސްސީން ވަނީ ބުނެފައެވެ.