މިސަރުކާރުން މުޅި ރާއްޖޭގައި 345 މަޝްރޫޢު މިވަގުތު ކުރިއަށް ގެންދާ ކަމަށް މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ މުޙައްމަދު އަސްލަމް މިއަދު ވިދާޅުވެއްޖެއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި މިނިސްޓަރ އަސްލަމް ވިދާޅުވީ މި ސަރުކާރުން ކުރިއަށް ގެންދިއުމަށް ނިންމާފައިވާ ގިނަ މަޝްރޫޢުތަކެއްގެ ޢަމަލީ މަސައްކަތް މިހާރު ފަށާފައިވާ ކަމަށެވެ. އެގޮތުން ގިނަ މަޝްރޫޢުތައް ކޮންޓްރެކްޓަރުންނާ ޙަވާލުކޮށްފައިވާކަމަށާއި ބީލަން މަރުޙަލާގައިވެސް ގިނަ މަސައްކަތްތަކެއް ހުރިކަމަށް އަސްލަމް ވިދާޅުވިއެވެ.

އަސްލަމް ވިދާޅުވީ 345 މަޝްރޫޢު މިވަގުތު ކުރިއަށް ދާއިރު ޕްލޭނިންގ ސްޓޭޖްގައި 77 މަޝްރޫޢެއް އޮތްކަމަށެވެ. ހަމައެއާއެކު ބަނދަރާއި ފާލަން ތަރައްޤީކުރުމުގެ 35 މަޝްރޫޢު ނިމިފައިވާ ކަމަށާއި 6 ރަށެއްގެ ބިން ހިއްކައި ނިމިފައިވާކަމަށްވެސް އަސްލަމް ވިދާޅުވިއެވެ. އަދި 4 ރަށެއްގެ ބިން ހިއްކުމުގެ ޢަމަލީ މަސައްކަތް ކުރިއަށްދާއިރު އިތުރު 10 ރަށެއްގެ ބިން ހިއްކުމަށް ކޮންޓްރެކްޓަރުންނާ ވަނީ ޙަވާލުކޮށްފައެވެ.

ހަމައެއާއެކު ގޮނޑުދޮށް ޙިމާޔަތްކުރުމުގެ 8 މަޝްރޫޢެއް ވަނީ ނިމިފައިކަމަށާއި އިތުރު 18 ރަށެއްގެ މަސައްކަތް ކޮންޓްރެކްޓަރާ ހަވާލުކޮށްފައިވާ ކަމަށެވެ. އަދި 23 ރަށެއްގެ ގޮނޑުދޮށް ޙިމާޔަތް ކުރުމުގެ މަސައްކަތް ކޮންޓްރެކްޓަރުންނާ ޙަވާލުކުރުމަށް ތައްޔާރުވެފައިވާކަމަށާއި 21 ރަށެއްގައި މަގުހެދުމުގެ ޢަމަލީ މަސައްކަތް ކުރިއަށްދާ ކަމަށްވެސް އަސްލަމް ވިދާޅުވިއެވެ.

މިނިސްޓަރ އަސްލަމް ވިދާޅުވީ ފެނާއި ނަރުދަމާގެ، 130އަށްވުރެ ގިނަ މަޝްރޫޢު ކޮންޓްރެކްޓަރުންނާ ޙަވާލުކޮށްފައިވާ ކަމަށާއި ރައީސްގެ ވަޢުދުފުޅާ އެއްގޮތަށް 2023ވަނަ އަހަރު ނިމޭއިރު ރާއްޖޭގެ ހުރިހާ ރަށެއްގައި ރައްކާތެރި ފެނާއި ނަރުދަމާގެ ނިޒާމު ޤާއިމުކުރެވޭނެ ކަމަށެވެ.