ޤައުމީ ކުޅިވަރު ޖަމިއްޔާތަކުގެ އިންތިހާބުތައް އިލެކްޝަންސް ކޮމިޝަނުން ބާއްވަން ހުށަހެޅި ބިލު މަޖިލީހުގެ ތަޅުމުން ބޭރުކޮށްލައިފިއެވެ.

ހެންވޭރު ހުޅަނގު ދާއިރާގެ މެންބަރު ހަސަން ލަތީފު ހުށަހަޅުއްވާފައިވާ މިބިލު ފާސްކުރުމަށް 21 މެންބަރުން ވޯޓު ދެއްވާފައިވާއިރު ނުފެންނަކަމަށް 31 މެންބަރުންވަނީ ވޯޓު ދެއްވާފައެވެ.

ޙަސަންގެ އިސްލާހުތަކުގެ ތެރޭގައި ކުޅިވަރާ ބެހޭ ގައުމީ މަޖިލީހާއި ޤައުމީ ކުޅިވަރު ޖަމިއްޔާތަކުގެ އިންތިހާބު ބާއްވާނީ އިލެކްޝަން ކޮމިޝަނުން ކަމަށް ހިމަނުންވާފައިވާތީ އެކަމާ ދެކޮޅަށް ސްޕޯޓްސް މިނިސްޓަރު އަހުމަދު މަހުލޫފާއި ރާއްޖޭގެ 18 ގައުމީ ކުޅިވަރު އެސޯސިއޭޝަނުން މީގެ ކުރިން ވަނީ ކަންބޮޑުވުން ފާޅުކޮށްފައެވެ.

ޙަސަންގެ އިސްލާޙުގައިވާ ގޮތުން އިންތިހާބުތަކާ ބެހޭ އެންމެހާ ކަންކަން އިންތިޒާމްކުރާނީ އިލެކްޝަން ކޮމިޝަނުންނެވެ. އަދި އެ އިންތިހާބު ބޭއްވުމަށް އިލެކްޝަން ކޮމިޝަނުން ބޭނުންވާ އެންމެހާ ލިޔެކިޔުމާއި އެހެނިހެން ވަސީލަތްތައް ދައުލަތުގެ ކަމާބެހޭ އެންމެހާ އިދާރާތަކުން އިލެކްޝަން ކޮމިޝަނަށް ފޯރުކޮށްދޭންވާނެ އެވެ.

ކުޅިވަރު އެސޯސިއޭޝަންތަކުގެ އިންތިހާބުތައް މިހާތަނަށް ބާއްވަމުން އަންނަނީ އެ އެސޯސިއޭޝަނެއްގެ ހިންގާ ކޮމިޓީން ކަނޑައަޅާ އިލެކްޓޯރިއަލް ކޮމިޓީއެއް މެދުވެރިކޮށެވެ. އިލެކްޓޯރިއަލް ކޮމިޓީން ކުރާ ހުރިހާ ކަމެއް ބައިނަލްއަގުވާމީ ފެޑެރޭޝަންތަކުންނާއި ރާއްޖޭގެ އޮލިމްޕިކް ކޮމިޓީން ވެސް މޮނިޓާކުރެ އެވެ.