3 ފަތުރުވެރިންނާއެކު ދަތުރުކުރި ސަފާރީއެއްގައި ރޯވެ ފެތިއްޖެއެވެ.

މޯލްޑިވްސް ނޭޝަނަލް ޑިފެންސް ފޯސް އެމްއެންޑީއެފުން ބުނީ ކ.ގާފަރާ ދިމާ 13 މޭލު ހުޅަނގުން، 9 މީހުންނާއެކު ދަތުރުކުރި "އަވި" ނަމަކަށް ކިޔާ ސަފާރީއެއްގައި ރޯވެ އަނދަމުން ދާކަމުގެ މަޢުލޫމާތު އެމްއާރުސީސީއަށް ލިބުނީ ޖޫން 16 ދުވަހުގެ ރޭ 22:51 ހާއިރު ކަމަށެވެ. ހާދިސާ ހިނގިއިރު އެ ސަފާރީގައި ތިބީ 3 ފަތުރުވެރިންނާއި 6 ފަޅުވެރިން ކަމަށް އެމްއެންޑީއެފުން ވަނީ ބުނެފައެވެ.

އެމްއެންޑީއެފުން ބުނީ ޙާދިސާގެ މަޢުލޫމާތު ލިބުމާއެކު ކޯސްޓްގާޑު ސެކަންޑް ސްކޮޑްރަންގެ ފަޔަރު ލޯންޗާއި، ހާބަރކްރާފްޓް އަދި ސީ އެމްބިއުލާންސް، މީހުން ސަލާމަތްކުރުމަށް ޙަރަކާތްތެރިވި ކަމަށެވެ. ސަފާރީގައި ރޯވުމުން އޭގައިތިބި ފަޅުވެރިންނާއި ފަސެންޖަރުން ވަނީ ސަފާރީގެ ޑައިވިންގ ދޯންޏަށް ބަދަލުވެފައިކަމަށް އެމްއެންޑީއެފުން ވަނީ ބުނެފައެވެ.

ޑައިވިންގ ދޯނީގައިތިބި މީހުންގެ ތެރެއިން 3 ފަތުރުވެރިންނާއި ސަފާރީގެ ފަޅުވެރިއަކު ކޯސްޓްގާޑު ސީއެމްބިއުލާންސްއަށް ނަގައި، ރޭ 1 ޖަހާކަންހާއިރު ކ.ގާފަރަށް ވަނީ ގެންގޮސްދީފައި ކަމަށް އެމްއެންޑީއެފުން މަޢުލޫމާތުދެއެވެ.

އެމްއެންޑީއެފުން ބުނީ ރޯވި ސަފާރީ މިހާރު އެއްކޮށް ފެތިފައިވާ ކަމަށެވެ.