ސިޔާސީ ޕާޓީއަށް ލިބޭ އާމްދަނީއާއި ޚަރަދު ބަލަހައްޓަނީ ގާނޫނާއި އެއްގޮތަށްތޯ ބެލުމުގެ މަސައްކަތް އިލެކްޝަންސް ކޮމިޝަނުން ފަށައިފިއެވެ.

އިލެކްޝަންސް ކޮމިޝަނުން ބުނީ ‏ސިޔާސީ ޕާޓީއަށް ލިބޭ އާމްދަނީއާއި ޚަރަދު ޕާޓީތަކުން ބަލަހައްޓަމުންދަނީ ސިޔާސީ ޕާޓީގެ ޤާނޫނުގެ 41 ވަނަ މާއްދާގެ (ހ) އާ އެއްގޮތަށްތޯ ބެލުމުގެ ގޮތުން، އީސީގެ އިންޓަރނަލް އޮޑިޓް ޓީމެއް ދައުލަތުން ފައިސާ ދޭ 4 ޕާޓީގެ އޮފީހަށް ދާގޮތަށް ކޮމިޝަނުން ހަމަޖައްސާފައިވާ ކަމަށެވެ. ނަމަވެސް މިކަމުގެ އިތުރު ތަފްސީލެއް ނުދެއެވެ.

ދައުލަތުގެ ބަޖެޓުން ފައިސާ ދޫކުރާ އަދަދަށް މެމްބަރުން ތިބި 4 ސިޔާސީ ޕާޓީއަކަށް އިލެކްޝަންސް ކޮމިޝަނުން މިއަހަރުވެސް ވަނީ ފައިސާ ދޫކޮށްފައެވެ.

މިއަހަރުގެ ބަޖެޓް ފާސްކުރިއިރު، ޤާނޫނުގައި ބުނާ އަދަދަށް މެމްބަރުން ތިބީ 4 ޕާޓީއަކީ އެމްޑީޕީއާއި، އިދިކޮޅު ޕީޕީއެމްގެ އިތުރުން ސަރުކާރު ކޯލިޝަންގައި ހިމެނޭ ޖުމްހޫރީ ޕާޓީއާއި އަދާލަތު ޕާޓީއެވެ.

ސިޔާސީ ޕާޓީއަށް ލިބޭ އާމްދަނީ/ޚަރަދު ޕާޓީތަކުން ބަލަހައްޓަމުންދަނީ ސިޔާސީ ޕާޓީގެ ޤާނޫނުގެ 41 ވަނަ މާއްދާގެ (ހ) އާ އެއްގޮތަށްތޯ ބެލުމުގެ ގޮތުން، އީސީގެ އިންޓަރނަލް އޮޑިޓް ޓީމެއް ދައުލަތުން ފައިސާ ދޭ 4 ޕާޓީގެ އޮފީހަށް ދާގޮތަށް ކޮމިޝަނުން ހަމަޖައްސައި އެކަން ފަށައިފި. @ElectionsMv

— Ismail Habeeb (@IsmailHabeeb) June 19, 2022

މިފަހަރު ޕާޓީތަކަށް ފައިސާ ދޫކުރި ގޮތަށް ބަލާއިރު އެމްޑީޕީ 15،024،009.96 ރުފިޔާ، ޕީޕީއެމް 9،410،483.51 ރުފިޔާ، ޖޭޕީ 5،526،669.74 ރުފިޔާ، އަދާލަތު ޕާޓީ، 2،900،903.79 ރުފިޔާއެވެ.

ސިޔާސީ ޕާޓީތަކުގެ ޤާނޫނުގައިވާ ގޮތުން ސިޔާސީ ޕާޓީތަކުގެ ތެރެއިން ދައުލަތުގެ ބަޖެޓުގެ 0.01 އިންސައްތަ ފައިސާ ސިޔާސީ ޕާޓީތަކަށް ދޫކުރަންޖެހެެއެވެ. މިއަދަދަށް ފައިސާ ދޫކުރަނީ ސިޔާސީ ޕާޓީތަކުގެ ތެރެއިން 10،000 މެމްބަރުން ހަމަވާ ޕާޓީތަކަށެވެ.