ރިޔާސަތުން ޢަމަލުކުރަށްވާގޮތުން ހިތްހަމަނުޖެހުން ފާޅުކުރަށްވައި ހައުސިންގ މިނިސްޓަރ މުޙައްމަދު އަސްލަމާއި ސުވާލު ކުރެއްވުމަށް އިދިކޮޅު މެންބަރުން މިއަދު ދެކޮޅު ހައްދަވައިފިއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި ހައުސިންގ މިނިސްޓަރ މުޙައްމަދު އަސްލަމާއި ސުވާލު ކުރެއްވުމަށް ހަމަޖެހިފައިއޮތީ ނައިފަރު ދާއިރާގެ މެންބަރު އަހްމަދު ޝިޔާމާއި މާވަށު ދާއިރާގެ މެންބަރު މުހައްމަދު ސައީދެވެ.

ނަމަވެސް ރިޔާސަތުން މެންބަރު ޝިޔާމަށް އެ ފުރުސަތު އެރުވި ނަމަވެސް ޝިޔާމް ވަނީ މިނިސްޓަރާ ސުވާލު ކުރެއްވުމުގެ ބަދަލުގައި ބަރަހަނާ މަންޒަރުތަކުގެ ކުއްލި މައްސަލަ ހުށަހަޅަން ފުުރުސަތު ނުދެއްވުމުން ކަންބޮޑުވުން ފާޅު ކުރައްވާފައެވެ.

ޝިޔާމް ވިދާޅުވީ ބަރަހަނާ ފޮޓޯތަކުގެ މައްސަލައިގެ ކަންބޮޑުވުމަށްވުރެ ބޮޑު މައްސަލައެއް ދިވެހިރާއްޖޭގައި މިވަގުތު ނެތްކަމަށެވެ. އަދި އެމައްސަލަ ހުށައެޅުމަށް ފުރުސަތުނުދީ މަޖިލިސް ހިންގާނަމަ "ވަޒީރާ ސުވާލު ކުރަން ބޭނުންނުވާ" ކަމަށް ޝިޔާމް ވިދާޅުވިއެވެ.

އެއަށްފަހު މެންބަރު ސައީދަށް ފުރުސަތު އެރުވުމުން ސަޢީދު ވިދާޅުވީ "މަޖިލީސް ކުރިއަށް ގެންދަވަނީ އިންސާފުވެރިކަމާއެކު ކަމަށް ޤަބޫލުފުޅު ނުކުރަށްވާ" ކަމަށެވެ. އެހެންކަމުން މިނިސްޓަރާއި ސުވާލުކުރެއްވުމަށް ބޭނުންނޫން ކަމަށް ސަޢީދުވެސް ވިދާޅުވިއެވެ.

ދެ މެންބަރުން ސުވާލުކުރައްވަން ދެކޮޅު ހެއްދެވުމުން، ޖަލްސާއަށް ހާޒިރުވެވަޑައިގެން އިންނެވި މިނިސްޓަރ އަސްލަމް ވަނީ ރިޔާސަތުގެ ހުއްދައާއެކު ޖަލްސާ ދޫކުރަށްވައި ވަޑައިގަންނަވާފަ އެވެ.

އެއަށްފަހު އިދިކޮޅު މެންބަރުން ރިޔާސަތުގެ ކުރިމަތީގައި ކޮޅަށް ތިއްބަވައި ހިތްހަމަނުޖެހުން ފާޅުކުރަށްވަން ފެއްޓެވުމުން ރައީސް ނަޝީދުވަނީ ރިޔާސަތު ދޫކޮށްލައްވައި އެބޭފުޅުންނާ މަޝްވަރާ ކުރަށްވަން ވަޑައިގަންނަވާފައެވެ.

ނަމަވެސް، އިދިކޮޅު މެންބަރުން ގޮނޑިކޮޅަށް ދިއުމަށް ދެކޮޅު ހެއްދެވުމުން ރައީސް ނަޝީދު ވަނީ ހުސް ވަގުތުކޮޅަކަށް ޖަލްސާ މެދުކަނޑާލައްވާފައެވެ.