މޯލްޑިވިއަން ބަނގުރޫޓުވާތީ ހުށަހެޅި މައްސަލަ މަޖިލީހުން ބޭރުކޮށްލައިފިއެވެ.

ރައްޔިތުންގެ މަޖިލީހުގެ މިއަދުގެ ޖަލްސާއަށް މި މައްސަލަ ހުށައެޅުއްވީ މާވަށު ދާއިރާގެ މެމްބަރު މުހައްމަދު ސައީދެވެ. ކުއްލި މައްސަލައިގައި ބުނެފައިވަނީ، އައިލެންޑް އޭވިއޭޝަން ބަނގުރޫޓުވާ ހިސާބަަަށް ގޮސްފައިވާ ކަމަށާއި ނާޤާބިލް ވެރިންގެ ސަބަބުން ކުންފުނީގެ ހިންގުން ބޮއްސުންލާފައިވާ ކަމަށެވެ.

2020 ވަނަ އަހަރު ކުންފުންޏަށް 400 މިލިއަން ރުފިޔާގެ ގެއްލުން ވެފައިވާ ކަމަށާއި، 2021 ވަނަ އަހަރުވެސް 159 މިލިއަން ރުފިޔާ ގެއްލުންވެ ކުންފުނި ދަރަނިވެރިވެފައިވާ ކަމަށް ސަޢީދު ހުށައެޅި މައްސަލާގައިވެއެވެ.

ކުންފުނީގެ ދަރަނިން އަރައިގަތުމަށް ސްޓޭޓް ބޭންކް އޮފް އިންޑިއާއިން 2020 ވަނަ އަހަރު 17.3 މިލިއަން ރުފިޔާގެ ލޯނެއް ނަގާ، އައިލެންޑް އޭވިއޭޝަނަށް އެސްބީއައިއިން ދޫކޮށްފައިވާ އޯވަޑްރާފްޓް ދަރަނީގެ އަދަދު 46.2 މިލިއަން ރުފިޔާއަށް އިތުރުކޮށްފައިވާ ކަމަށް މައްސަލާގައިވެއެވެ.

"އެމްއޭސީއެލްއަށް ވެސް 50 މިލިއަނަށްވުރެ ގިނަ ރުފިޔާ ދައްކަން ޖެހިފައިވާތީ، މިހާރުވެސް ކުންފުނީގެ މުވައްޒަފުންނަށް މުސާރަ ދެނީ ކޮންމެ މަހަކު ފިނޭންސް މިނިސްޓްރީން 15- 18 މިލިއަން ރުފިޔާ ދީގެން" ސަޢީދު ހުށައެޅުއްވި މައްސަލާގައިވެއެވެ.

މި ކުއްލި މައްސަލަ މަޖިލީހަށް ބަލައިގަތުމަށް ފެންނަ ކަމަށް 8 މެމްބަރުން ވޯޓު ދެއްވާފައިވާއިރު މައްސަލަ ބަލައިގަންނަން ނުފެންނަ ކަމަށް 19 މެމްބަރުން ވޯޓު ދެއްވާފައިވެއެވެ.