މާލޭގެ 32 މިސްކިތް މަރާމާތުކުރުމަށް 13 މިލިއަން ރުފިޔާ ބޭނުންވާ ކަމަށް މާލޭ ސިޓީ ކައުންސިލުން ހާމަކޮށްފިއެވެ.

މާލޭ ސިޓީ ކައުންސިލްގެ އަހަރީ ރިޕޯޓްގައި ބުނެފައިވަނީ މިސްކިތްތައް މަރާމާތު ކުރުމަށް ބޭނުންވާ ފައިސާގެ ތެރެއިން އެއް މިލިއަން ރުފިޔާ ދައުލަތުގެ ބަޖެޓުން ދީފައިވާ ކަމަށެވެ. ހަމައެއާއެކު ސިޓީ ކައުންސިލްގެ އާމްދަނީން އެއް މިލިއަން ރުފިޔާ މިސްކިތު މަރާމާތަށް ޚާއްސަކޮށްފައިވެއެވެ.

ރިޕޯޓުގައި ފާހަގަކޮށްފައިވާ ގޮތުން އާއްމު ފަރާތްތަކުން ހަ މިސްކިތެއްގެ މަރާމާތު މަސައްކަތް ކުރަމުންދެއެވެ. އެ މަސައްކަތަށް އާއްމު ފަރާތްތަކުން ތިން މިލިއަން ރުފިޔާ ވަނީ ދީފައެވެ.

އިސްލާމިކް މިނިސްޓްރީން މީގެ ކުރިން ބުނެފައިވަނީ މިދިޔަ ރަމަޟާންމަހާ ދިމާކޮށް މިސްކިތްތައް މަރާމާތު ކުރުމަށްޓަކައި 15 މިލިޔަން ރުފިޔާ ކައުންސިލްތަކަށް ދޫކުރުމަށް ހަމަޖެހިފައިވާ ކަމަށެވެ.

އެގޮތުން މާލެ ސިޓީ ކައުންސިލަށް މިސްކިތް މަރާމާތު ކުރުމަށް 3 މިލިއަން ރުފިޔާ ދޫކޮށްފައިވާކަމަށްވެސް އިސްލާމިކް މިނިސްޓްރީން ހާމަކޮށްފައިވެއެވެ.