ހުރަވީ ބިލްޑިންގ ތަޅާލައި، އެތަނުގައި ޕާކެއް ތަރައްޤީކުރުމަށް މިޖުލައިމަހުގެ ތެރޭގައި ފަށާނެކަމަށް ޕްލޭނިންގ މިނިސްޓްރީން ހާމަކޮށްފިއެވެ.

ޕްލޭނިންގ މިނިސްޓްރީން ބުނީ، މޫސުން ގޯސްވުމުގެ ސަބަބުން ހުރަވީ ބިލްޑިންގ ތަޅާލުމުގެ މަސައްކަތް ކުޑަކޮށް މަޑުޖެހުނު ކަމަށެވެ. ނަމަވެސް މިހާރު އެ މަސައްކަތް ވަރަށް ބާރަށް ކުރިއަށްދާކަމަށާއި، މިމަހުގެ ނިޔަލަށް މަސައްކަތް ނިންމާލެވޭނެކަމަށް ލަފާކުރެވޭ ކަމަށް މިނިސްޓްރީން ވަނީ ބުނެފައެވެ.

މިހާރު ކުރިއަށްދަނީ ހުރަވީ ބިލްޑިންގ ހުރި ތަނުގައި ތަރައްޤީކުރާ ޕާކު ޑިޒައިންކުރުމުގެ މަސައްކަތް ކަމަށްވެސް މިނިސްޓްރީން ވަނީ ބުނެފައެވެ. މިއީ ވެހިކަލްތަކަށްވެސް ޕާކުކުރެވޭނެ ޖާގައާއެކު ތަރައްޤީކުރާ ޕާކެކެވެ. މިނިސްޓްރީން މަސައްކަތް ކުރަމުންދަނީ މި ޕާކުގެ މަސައްކަތް އޯގަސްޓްމަހުގެ ތެރޭގައި ނިންމާލުމަށެވެ.

ރައީސް މައުމޫނުގެ ވެރިކަމުގައި 1980ގެ އަހަރުތަކުގައި އަކިރި ބޭނުންކޮށްގެން 4 ފަންގި ފިލާއަށް ޢިމާރާތްކޮށްފައިވާ ހުރަވީ ބިލްޑިންގ ވަނީ ވަރަށް ބޮޑަށް ބާވެ، ހަލާކުވެފައެވެ. ކުރީގެ ރައީސް ނަޝީދުގެ ވެރިކަމުގައިވެސް އެ އިމާރާތް ތަޅާލަން އުޅުނެވެ. ނަމަވެސް އެތަނުގައި ހިންގާ އޮފީސްތައް ބަދަލުކުރަން އެހެން ތަނެއް ނެތުމުން އެކަން ނުކޮށް އޮތީއެވެ.

ހުރަވީ ބިލްޑިންއަކީ ރައްކާތެރި ތަނަކަށް ނުވުމާއެކު އެ ޢިމާރާތް މިހާރު ވަނީ ހުސްކޮށް އެތަނުގައި ހިންގަމުން އައި އޮފީސްތައްވެސް އެހެން ޢިމާރާތްތަކަށް ބަދަލުކޮށްފައެވެ.

ސަރުކާރުން ނިންމާފައިވަނީ އެ ޢިމާރާތް ތަޅާލާ އެތަނުގައި ޕާކެއް ތަރައްޤީކުރުމަށެވެ. އަދި އެ ޕާކް ތަރައްޤީކުރަނީ ދުއްވާ އެއްޗެހި ޕާކް ކުރެވޭނެ އިންތިޒާމްތަކާ އެކުކަމަށްވެސް ސަރުކާރުން ބުނެއެވެ.