މަކުނުވިދުރިއަށް ޓެސްޓްކުރާ ޕީސީއާރް ކިޓްތަކެއް ދުނިޔޭގެ ޞިއްޙަތު ޖަމިއްޔާ، ޑަބްލިއުއެޗްއޯއިން ރާއްޖެއަށް ހަދިޔާކޮށްފިއެވެ.

ދުނިޔޭގެ އެކި ކަންކޮޅުތަކުގައި މިހާރު ފެތުރެމުންދާ "މަންކީޕޮކްސް" އާއި ގުޅިގެން ބައިނަލްއަޤްވާމީ ޞިއްޙަތާބެހޭ ޤަވާއިދުތަކުގެ ދަށުން ދުނިޔޭގެ ޞިއްޙަތު ޖަމްޢިއްޔާއިން 23 ޖުލައި 2022 ގައި ވަނީ ޢާންމު ޞިއްޙަތުގެ ކުއްލި ނުރައްކަލުގެ ޙާލަތު އިޢުލާންކޮށްފައެވެ. އެ ޖަމިއްޔާއިން މިއަދު ވަނީ ރާއްޖެއަށް މަކުނުވިދުރިއަށް ޓެކްސްޓްކުރުމަށް 250 ޕީސީއާރް ކިޓް ހަދިޔާކޮށްފައެވެ.

ޑަބްލިއުއެޗްއޯއިން ރާއްޖެއަށް މިއަދު 250 ޓެސްޓް ކިޓް ހަދިޔާކޮށްފައިވާއިރު، އިތުރު ކިޓްތައް މޮބިލައިޒް ކުރުމުގެ މަސައްކަތްވެސް ޑަބްލިއުއެޗްއޯއާ ގުޅިގެން ކުރަމުން އަންނަކަމަށް ހެލްތު މިނިސްޓްރީން ވަނީ ބުނެފައެވެ. އަދި ކުރިއަށް އޮތް ހަފްތާއެއްހާ ދުވަހުގެ ތެރޭގައި އިތުރު ޓެސްޓިން ކިޓްތައް ރާއްޖެއަށް ލިބޭނެ ކަމަށްވެސް އެ މިނިސްޓްރީން މަޢުލޫމާތުދެއެވެ.

ޓެސްޓް ކިޓް ހަދިޔާކުރުމުގެ އިތުރުން، މަންކީޕޮކްސް ޕީ.ސީ.އާރް ޓްރެއިނިންގއެއް މާދަމާ ކުރިއަށް ގެންދިއުމަށް ހަމަޖެހިފައިވާކަމަށް ހެލްތު މިނިސްޓްރީން ބުނެއެވެ. ވަރޗުއަލްކޮށް ކުރިއަށްގެންދިއުމަށް ހަމަޖެހިފައިވާ މި ތަމްރީނުގައި ރާއްޖޭގެ ބޮޑެތި މައި ހޮސްޕިޓަލްތަކުގެ ލެބޯޓްރީތަކުގައި މަސައްކަތްކުރާ މުވައްޒަފުން ބައިވެރިވާނެއެވެ.

މަންކީޕޮކްސް ރާއްޖެއަށްވެސް އައުމުގެ ފުރުޞަތު އޮތުމާއެކު ބައްޔަށް ޝައްކުކުރެވޭ ކޭސްތަކަށް އިޖާބަދީ، ކޭސް އިންވެސްޓިގޭޝަން، ކޮންޓެކްޓް ޓްރޭސިން، ޓެސްޓް އަދި ރިސްކް ކޮމިއުނިކޭޝަންސްގެ ކެޕޭސިޓީ އިތުރުކުރުމަށް ހެލްތު މިނިސްޓްރީއާއި ކަމާގުޅޭ އިދާރާތައް ގުޅިގެން ދަނީ މަސައްކަތް ކުރަމުންނެވެ.