މުވައްޒަފުންނަށް ލުއި ފަސޭހަކުރުމަށްޓަކައި ހުޅުމާލެ ދެވަނަ ފިޔަވަހީގައި ސްޓެލްކޯއިން ތަރައްގީކުރި ފްލެޓްތަކުގެ ތަޅުދަނޑި 306 މުވައްޒަފަކަށް މިއަދު ހަވާލުކޮށްފި އެވެ.

މިއަދު ހެނދުނު ހުޅުމާލޭ ދެވަނަ ފިޔަވަހީގައި ބޭއްވި ރަސްމިއްޔާތުގައި 306 ފަރާތަކަށް ތަޅުދަނޑި ހަވާލުކޮށްފައިވާއިރު ބާކީ 52 އެޕާޓްމަންޓުގެ ތަޅުދަނޑި ފަހުން ހަވާލުކުރާނެ ކަމަށް ސްޓެލްކޯއިން ވަނީ ބުނެފަ އެވެ. އެ 52 ފްލެޓް ހަވާލުނުކުރެވި ވަނީ ފްލެޓް ލިބުނު މުވައްޒަފުން ސްޓެލްކޯއާއެކު ސޮއިކުރަން ޖެހޭ އެއްބަސްވުމުގައި ސޮއިކޮށްފައި ނުވާތީއެވެ.

މިރަސްމިއްޔާތުގައި ވާހަކަދައްކަވަމުން ސްޓެލްކޯގެ މެނޭޖިން ޑިރެކްޓަރު އަހްމަދު ޝަރީފް ވިދާޅުވީ އެއްބަސްވުމުގައި ސޮއި ނުކޮށް ތިބި މުވައްޒަފުން އެންމެ ލަސްވެގެން ކުރިއަށް އޮތް ސެޕްޓެމްބަރު މަސް ނިމުމުގެ ކުރިން އެއްބަސްވުމުގައި ސޮއި ކުރަންޖެހޭނެ ކަމަށެވެ.

ޗައިނާގެ ރޯޓައިމްސް ކުންފުންޏާ ހަވާލު ކޮށްގެން އިމާރާތް ކުރި ފްލެޓްތަކަށް 696 މިލިއަން ރުފިޔާ ހޭދަވި ނަމަވެސް މުވައްޒަފުންގެ އަތުން ނަގާނީ ޖުމުލަ 623 މިލިއަން ރުފިޔާއެވެ. މި ފައިސާ ދައްކަންޖެހެނީ 18 އަހަރަށް ބަހާލައިގެންނެވެ.

މުވައްޒަފުންނަށް ލުއިފަސޭހަ ގޮތެއްގައި ބޯހިޔާވަހިކަން ފޯރުކޮށްދިނުމަށްޓަކައި ހިޔާ މަޝްރޫޢުގެ ތެރޭގައި ހިމަނައިގެން ސްޓެލްކޯއިން ވެސް ވަނީ ދެ ޓަވަރު އަޅާފަ އެވެ. "ބްލޫ ރިޖް-1" އަދި "ބްލޫ ރިޖް-2"ގެ ނަން ދީފައިވާ ދެ ޓަވަރުގައި ޖުމްލަ 360 އެޕާޓްމަންޓް ހުރެއެވެ. އެއީ 1 ކޮޓަރީގެ 72 އެޕާޓްމަންޓާއި، އަދި 2 ކޮޓަރި، ޕްލަސް މެއިޑް ރޫމް ހިމެނޭ 288 އެޕާޓްމަންޓެވެ.

ސްޓެލްކޯގެ އެއްކޮޓަރީގެ އެޕާޓްމަންޓްތަކުގެ ކުއްޔަކީ މަހަކު 5622 ރުފިޔާއެވެ. މެއިޑް ރޫމް ހިމެނޭ ތިން ކޮޓަރީގެ އެޕާޓުމެންޓުތަކުގެ ކުއްޔަކީ މަހަކު 10،356 ރުފިޔާ އާއި 10،652 ރުފިޔާ އާ ދެމެދުގެ އަގެކެވެ. އެއްކޮޓަރީގެ އެޕާޓްމަންޓްތަކުން މެއިންޓެނެންސް ފީގެ ގޮތުގައި އިތުރު 1000 ރުފިޔާ ދައްކަންޖެހެއެވެ. އަދި ތިންކޮޓަރީގެ އެޕާޓްމަންޓްތަކުން މެއިންޓެނެންސް ފީގެ ގޮތުގައި އިތުރު 1300 ރުފިޔާ ދައްކަންޖެހެއެވެ.

ސްޓެލްކޯއިން ބުނީ ފްލެޓަށްއެދި ކުރިމަތިލީ ހުރިހާ މުވައްޒަފުންނަށްވެސް ފްލެޓް ލިބޭނެ ކަމަށެވެ.