ސްޓެލްކޯގެ ޚިދުމަތް ދޭންވީގޮތް ކަނޑައަޅާނީ ރައްޔިތުން ކަމަށާއި ސްޓެލްކޯގެ ޒިންމާއަކީ ރައްޔިތުން އެދޭގޮތަށް ޚިދުމަތް ފޯރުކޮށްދިނުން ކަމަށް ސްޓެލްކޯގެ މެނޭޖިންގ ޑިރެކްޓަރ އަޙްމަދު ޝަރީފް ވިދާޅުވެއްޖެއެވެ.

ސްޓެލްކޯއިން ހުޅުމާލޭ ފޭސް2 ގައި ޢިމާރާތްކުރި ފްލެޓްތައް މުވައްޒަފުންނާ ހަވާލުކުރުމަށް މިއަދު ބޭއްވި ރަސްމިއްޔާތުގައި ވާހަކަފުޅު ދައްކަވަމުން އެމްޑީ ޝަރީފު ވިދާޅުވީ ސްޓެލްކޯގެ ޚިދުމަތް ދޭންވީގޮތް ކަނޑައަޅާނީ ޢާއްމު ރައްޔިތުންކަމަށެވެ.

ޝަރީފް ވިދާޅުވީ މުވައްޒަފުންގެ ކިބައިން އެދެނީ ރައްޔިތުންނަށް ހިތްހަމަޖެހުމާއި އުފާވެރިކަން ގެނެސްދިނުން ކަމަށާއި ސްޓެލްކޯ ފްލެޓް ތަކަކީ މުވައްޒަފުންނަށްވެސް ވަރަށް ބޮޑަށް ލުއިވާ ގޮތަށް ޙަވާލުކުރި ފްލެޓްތަކެއް ކަމަށެވެ.

"ހިދުމަތް ބަލައިގަންނަ ފަރާތަކީ އާންމު ރައްޔިތުން. އާންމު ރައްޔިތުންނަށް އެނގޭނީ ހިދުމަތް ދޭންވީ ގޮތް. އެކަން ކަނޑައަޅާނީ ސްޓެލްކޯއަކުން ނޫން. މިކަން ކޮށްދޭށޭ އަޅުގަނޑު ދަންނަވާނީ." ޝަރީފް ވިދާޅުވިއެވެ.

އެމްޑީ ޝަރީފް މިއަދު ވިދާޅުވީ ސްޓެލްކޯގެ ފްލެޓްތަކަށް ދައްކަންޖެހޭ ކުލި ބަލައިގަންނާނީ ސްޓެލްކޯއިން ކަމަށެވެ. އެގޮތަށް ކަނޑައެޅީ ބޭންކް ލޯނަކުން ކުލި ދައްކަންޖެހޭނަމަ އެއީ މުވައްޒަފުން އުފުލަންޖެހޭނެ ބޮޑު ބުރައަކަށް ވާނެތީކަމަށް ޝަރީފް ވިދާޅުވިއެވެ.

މިއަދުގެ ރަސްމިއްޔާތުގައި ޝަރީފް ވިދާޅުވީ އެގްރިމެންޓާ އެއްގޮތަށް ކުލި ނުދައްކާ 3 މަސް ދުވަސް ވެއްޖެނަމަ އެ މުވައްޒަފެއް ފްލެޓުން ނިކުންނަށް ޖެހޭނެ ކަމަށާއި، ސްޓެލްކޯގައި ފްލެޓް ބޭނުންވާ ގިނަ މުވައްޒަފުން ތިބުމާއެކު އެމުވައްޒަފުންގެ ހައްގުގައި އެކަން ކުރަން ޖެހިއްޖެނަމަ ސްޓެލްކޯއިން ކުލިނުދައްކާ އެޕާޓްމަންތައް ހުސްކުރާނެ ކަމަށެވެ. އެހެން ނަމަވެސް އެއްވެސް މައްސަލައެއް ދިމާވެގެން އެއްވެސް އާއިލާއަކުން ފްލެޓުން ނިކުންނަން ޖެހުމަކީ ސްޓެލްކޯއިން އެދޭ ކަމެއް ނޫންކަން ޝަރީފު ފާހަގަ ކުރެއްވިއެވެ.

މުވައްޒަފުންނަށް ލުއި ފަސޭހަކުރުމަށްޓަކައި ހުޅުމާލެ ދެވަނަ ފިޔަވަހީގައި ސްޓެލްކޯއިން ތަރައްގީކުރި ފްލެޓްތަކުގެ ތަޅުދަނޑި 306 މުވައްޒަފަކަށް މިއަދު ވަނީ ޙަވާލުކޮށްފައެވެ.