ހުރިހާ ކުދިންވެސް ނަމާދުކޮށް ޤުރުއާން ކިޔަވަންވާނެ ކަމަށް ވިދާޅުވެ ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ހުރިހާ ދަރިވަރުންނަށް ނަސޭޙަތް ދެއްވައިފިއެވެ.

ދިރާސީ އާހަރު ފެށުމާ ގުޅިގެން ތައުލީމީ ދާއިރާގައި ޙަރަކާތްތެރިވާ އެންމެހާ ފަރާތްތަކަށް ތަހުނިޔާ ފޮނުއްވަމުން ރައީސް ނަޝީދުވަނީ އެންމެހާ ދަރިވަރުންނަށްވެސް ނަސޭހަތް ދެއްވާފައެވެ. އެގޮތުން އެންމެ ރަނގަޅުގޮތަކީ ދުވަހުން ދުވަހަށް ފިލާވަޅުތައް ދަސްކުރުންކަމަށް ރައީސް ނަޝީދު ވިދާޅުވިއެވެ.

މި ދިރާސީ އަހަރަކީ ދަރިވަރުންނަށް ކާމިޔާބު އަހަރެއް ކަމުގައިވުމަށް އެދޭކަމަށް ރައީސް ނަޝީދު ވިދާޅުވިއެވެ. އަދި ކުޅިވަރުކުޅެ މަޖާކޮށް އުފާވެރިކަމާއެކު އުޅުމަށާއި ހަމައެއާއެކު ދީނީ ކަންތައްތަކަށް ފަރުވާތެރިވުމަށްވެސް ރައީސް ނަޝީދުވަނީ ނަސޭޙަތްތެރިވެ ލައްވާފައެވެ.

"ކޮންމެ ދުވަހަކު ޤަވާއިދުން ސްކޫލުގައި ނަގާދެވޭ ފިލާވަޅު ބަލައި ދަސްކުރުން އެއީ އެންމެ ރަނގަޅު ގޮތް. ނަމާދުކޮށް، ޤުރުއާން ކިޔަވަން ވާނެ." ރައީސް ނަޝީދު ވިދާޅުވިއެވެ.

Thauleemee au aharah marhaba. Konme dhuvahaku qawaidhun school gai nagaadhevey filaavalhuthah balaa dhaskurun e ee enme rangalhu goiy. Namaadhukoh, quran kiyavan vaane. Adhi kulhivaru kulhe majaa koh ufaaveri, kamiyaab ahareh kamugai vumah edhen.

— Mohamed Nasheed (@MohamedNasheed) August 7, 2022

ރައީސް ނަޝީދު މިއަދު ވިދާޅުވީ އެއްދަންފަޅި ސްކޫލާއި، ހެދުނުގެ ނާސްތާއާއި، ދީނީ އަދި އަޚުލާގީ ފުރިހަމަ ތަރުބިއްޔަތާއި، ކުޅިވަރާއި ކަސްރަތާއި، މިއުޒިކާއި ފަންނީ ކުރިއެރުން ދަރިވަރުންނަށް ހޯދައިދިނުމަށް ތަޢުލީމާބެހޭ ވުޒާރާއިން މަސައްކަތް ކުރަށްވާނެކަމުގެ ޔަގީންކަން އެބައޮތްކަމަށެވެ.

ތަޢުލީމީ ދާއިރާގެ އެންމެހާ ފަރާތްތަކަށް ރައީސް ނަޝީދު ތަހުނިޔާ ފޮނުއްވާފައިވާއިރު ދިރާސީ އާއަހަރުގެ ކިޔެވުން ރާއްޖޭގެ 217 ސްކޫލްގައި 92300 އަށްވުރެ ގިނަ ދަރިވަރުނާއެކު މިއަދުވަނީ ފަށާފައެވެ.