3 ޤައުމަކަށް ސަފީރުން ޢައްޔަނުކުރުމަށް މަޖިލީހުން ރުހުން ދީފިއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި ޔުނައިޓެޑް ސްޓޭޓްސް އޮފް އެމެރިކާއަށް ދިވެހިރާއްޖެއިން ކަނޑައަޅުއްވާފައިވާ ސަފީރުކަމަށް މއ.އަތަމާވިލާ އަބްދުލް ޣަފޫރު މުހައްމަދު އައްޔަން ކުރަން ރައްޔިތުންގެ މަޖިލީހުން ވަނީ ފާސްކޮށްފައެވެ.

މަޖިލީހުން އެގޮތަށް ފާސްކޮށްފައި ވަނީ ވޯޓުގައި ބައިވެރިވެވަޑައިގަތް 46 މެމްބަރުންގެ ވޯޓާއި އެކުގައެވެ. އަބްދުލް ޣަފޫރަކީ މިހާރު ފޮރިން މިނިސްޓްރީގެ އެމްބަސެޑާ އެޓް ލާޖްގެ މަގާމު އަދާކުރައްވަމުންދާ ބޭފުޅާއެވެ.

މިއަދުގެ ޖަލްސާގައި މެލޭޝިއާއަށް ރާއްޖެއިން ކަނޑަައަޅުއްވާ ސަފީރުކަަމަށް ހ.މާލެތިލަ، އަލީ ހުސެއިން ދީދީ އައްޔަންކުރުމަށްވެސް ރުހުން ދީފައިވެއެވެ. މަޖިލީހުން އެގޮތަށް ފާސްކޮށްފައި ވަނީ ވޯޓުގައި ބައިވެރިވެވަޑައިގަތް 46 މެމްބަރުންގެ ވޯޓާއި އެކުގައެވެ.

އަލީ ހުސެއިން ދީދީ އަކީ ރާއްޖެއިން ޔޫރަޕިއަން ޔޫނިއަންގައި ސަފީރުކަމުގެ މަޤާމްފުރުއްވާފައިވާ ބޭފުޅެކެވެ.

ހަމައެއާއެކު އިންޑިއާއަށް ދިވެހިރާއްޖެއިން ކަނޑައަޅާ ސަފީރު ކަމަށް ހ.ޖެހޭވައި އިބްރާހިމް ޝަހީބު އައްޔަން ކުރަން ރައްޔިތުންގެ މަޖިލީހުގެ 46 މެމްބަރުން މިއަދު ވަނީ ވޯޓުދެއްވާފައެވެ.

މީގެ ކުރިން ޝަހީބު ވަނީ ސިންގަޕޫރަށް ރާއްޖެ އިން ކަނޑައަޅުއްވާ ސަފީރުކަމުގެ މަޤާމު އަދާކުރައްވާފައެވެ.