މި ސަރުކާރުގައި ދެވަނައަށް އެންމެ ގިނަ ޕްރޮޖެކްޓް ހިންގީ ޔޫތު މިނިސްޓްރީން ކަމަށް ކުޅިވަރާބެހޭ ވަޒީރު އަޙްމަދު މަޙްލޫފު ވިދާޅުވެއްޖެއެވެ.

މިހާރު ކުރިއަށްދާ އެމްޑީޕީގެ ކޮންގްރެސްގެ މިއަދު ހެނދުނުގެ ސެޝަންގައި ވާހަކަފުޅު ދައްކަވަމުން މިނިސްޓަރ މަޙްލޫފް ވިދާޅުވީ ޕްލޭނިންގް މިނިސްޓްރީ ނެގުމަށްފަހު މި ސަރުކާރުގައި އެންމެ ގިނަ ޕްރޮޖެކްޓް ހިންގީ ޔޫތު މިނިސްޓްރީން ކަމަށެވެ.

މި ސަރުކާރުން ޒުވާނުންނަށް ޚާއްސަ ސަމާލުކަމެއް ދެއްވާކަން ފާހަގަ ކުރަށްވަމުން މިނިސްޓަރ ވަނީ އެކަމުގެ ބައެއް ތަފާސް ހިސާބުތައް ޙިއްސާކުރަށްވާފައެވެ. އެގޮތުން މަޙްލޫފު ވިދާޅުވީ ޕީޕީއެމްގެ ވެރިކަމުގައި އުފެއްދިފައިވަނީ 17847 ވަޒީފާ ކަމަށެވެ. އަދި މިސަރުކާރުން މިހާތަނަށް 18636 ވަޒީފާ އުފައްދާފައިވާ ކަމަށް މަޙްލޫފް ވިދާޅުވިއެވެ.

"މިއީ ޕެންޝަން އޮފީހުން ފެންނަންހުރި ސައްޙަ މަޢުލޫމާތު." މަޙްލޫފު މިއަދު ވިދާޅުވިއެވެ.

ހިލޭ ޑިގްރީ ޕްރޮގްރާމްގެ ދަށުން 14930 ޒުވާނުން ތަޢުލީމު ޙާސިލުކުރަމުންދާކަން މަޙްލޫފް ފާހަގަކުރެއްވިއެވެ. އަދި 468 ޒުވާނަކަށް ސްކޮލަރޝިޕް ޙަވާލުކޮށްފައިވާ ކަމަށާއި ސްޓޫޑެންޓް ލޯން 1981 ދަރިވަރަކަށް ދޫކޮށްފައިވާ ކަމަށް މަޙްލޫފް މިއަދު ވިދާޅުވިއެވެ.

އޭގެ އިތުރުން ރާއްޖޭގެ ކޮންމެ 5500 މީހަކަށް ބޮޑު ފުޓުބޯޅަ ދަނޑެއް ތަރައްޤީ ކުރެއްވުމަށް މަސައްކަތް ކުރަށްވާ ކަމަށް މަޙްލޫފް ވިދާޅުވިއެވެ. ރައީސް ޔާމީންގެ ވެރިކަމުގައި ބޮޑު ފުޓުބޯޅަދަނޑެއް އަޅާފައި ނެތް ކަމަށާއި އަދި ފުޓްސަލް ދަނޑުވެސް ޤާއިމު ކުރެވިފައި އޮތީ 58 ރަށެއްގައިކަން މިނިސްޓަރ ފާހަގަ ކުރެއްވިއެވެ.

މި ސަރުކާރުގެ 4 އަހަރުގެ ތެރޭގައި 50 ފުޓްސަލް ދަނޑު ތަރައްޤީ ކޮށްފައިވާ ކަމަށާއި 38 ބޮޑު ފުޓުބޯޅަ ދަނޑު ނިމިފައިވާ ކަމަށް މަޙްލޫފު ވިދާޅުވިއެވެ. ހަމައެއާއެކު 47 ބޮޑު ފުޓުބޯޅަ ދަނޑު އެޅުމުގެ މަސައްކަތް ކުރިއަށްދާކަމަށްވެސް މިނިސްޓަރ މަޙްލޫފް ވިދާޅުވިއެވެ.

"6 ރަށެއްގައި ސްވިމިންގ ޓްރެކް ގާއިމުކޮށް ވަނީ ނިންމާފައި، 50 ރަށެއްގައި ފުޓްސަލް ދަނޑު ގާއިމު ކުރުމުގެ މަޝްރޫއު ނިންމާ މި ވަގުތުވެސް އަޅުގަނޑުމެން 14 ރަށެއްގެ މަޝްރޫއު އެބަ ކުރިއަށް ގެންދަން." މަޙްލޫފު ވިދާޅުވިއެވެ.

މިނިސްޓަރ މަޙްލޫފު ވިދާޅުވީ 38 ރަށެއްގައި ޒަމާނީ ވޮލީ ކޯޓް ތަރައްޤީކުރުމުގެ މަސައްކަތް ކުރިއަށްދާ ކަމަށާއި 16 ރަށެއްގައި ބެޑްމިންޓަން ކޯޓު އެޅުމުގެ މަސައްކަތްވެސް ހިގަމުންދާ ކަމަށެވެ. މަޙްލޫފު މިއަދު ވިދާޅުވީ މިހާތަނަށް 130 ކުޑަކުދިންގެ ޕާކު ރަށްރަށަށް ފޮނުވިފައިވާ ކަމަށެވެ.

"10 ރަށެއްގައި ވޮލީ ކޯޓް އަޅާ ނިންމާފައި، 11 ރަށެއްގައިި ބެޑްމިންޓަން ކޯޓްވެސް އަޅާ ނިންމާފައި، އިންޑޯ ވޮލީ ކޯޓު ގާއިމުކުރުމުގެ މަސައްކަތް 3 ރަށެއްގައި ކުރިއަށް އެބަދޭ." މަޙްލޫފު ވިދާޅުވިއެވެ.

މުޅި ރާއްޖޭގައި މިހާތަނަށް 3 އިޖްތިމާއީ މަރުކަޒު ނިމިފައިވާ ކަމަށާއި 14 ރަށެއްގައި އިޖްތިމާއީ މަރުކަޒު ތަރައްޤީ ކުރުމުގެ މަޝްރޫއު ކުރިއަށްދާ ކަމަށް މަޙްލޫފު ވިދާޅުވިއެވެ. މިހާތަނަށް 60 ރަށެއްގައި އައުޓްޑޯ ޖިމްގެ މަޝްރޫއު ނިމިފައިވާ ކަމަށާއި 28 ރަށެއްގައި މަޝްރޫއު ކުރިއަށް ދާކަންވެސް މަޙްލޫފް ފާހަގަ ކުރެއްވިއެވެ.

"ބައިނަލްއަގްވާމީ ފެންވަރުގެ ނެޓްބޯޅަ ކޯޓް ގާއިމުކޮށް، ސިންތެޓިކް ޓްރެކް އަދި ބިލިއާޑް ފެސިލިޓީ ވާނީ އަޅުގަނޑުމެން މި ރާއްޖޭގައި ގާއިމުކޮށް ނިންމާފައި." މަޙްލޫފު ވިދާޅުވިއެވެ.

މަޙްލޫފް މިއަދު ވިދާޅުވީ މަތީތަޢުލީމާއި ކުޅިވަރުގެ ދާއިރާއިން ޒުވާނުންނަށް ކުރިއަށްދެވޭނެ ގިނަ ފުރުސަތުތަކެއް މި ސަރުކާރުން ތަނަވަސްކޮށްދީފައިވާ ކަމަށެވެ.