މ.ކޮޅުފުށީ ހައުސިން މަޝްރޫޢު ކުރިއަށް ގެންގޮސްދޭނެ ބަޔަކު ހޯދުމަށް ސަރުކާރުން އިޢުލާންކޮށްފިއެވެ.

ކޮޅުފުށީގައި ތަރައްޤީކުރުމަށް ހަމަޖެހިފައިވާ 100 ހައުސިން ޔުނިޓްގެ މަޝްރޫޢު އެކިއެކި ސަބަބުތައް މެދުވެރިވެ ކުރިއަށް ނުގެންދެވިގެން ވަނީ ހުއްޓިފައެވެ. މިއީ ރަށްރަށުގައި ޢިމާރާތް ނޭޅި ގިނަދުވަސްވެފައިވާ ހުރި ގެވަޅުތަކުގައި ސަރުކާރުގެ އެހީގައި ޢިމާރާތް ކުރުމަށް އެކުލަވާލި ކޮންސެޕްޓްގެ ދަށުން ފަށާފައިވާ މަސައްކަތެކެވެ.

75 މިލިއަނަށް ވުރެ ގިނަ ރުފިޔާގެ މި މަޝްރޫއުގެ މަސައްކަތް 11 މަހާއި 20 ދުވަހުން ނިންމާގޮތަށް ކުންފުންޏަކާ ހަވާލުކޮށްފައިވަނީ 2019 ވަނަ އަހަރުގެ އޮކްޓޫބަރުމަހުއެވެ. 2021 ވަނަ އަހަރު ޕްރޮޖެކްޓްގެ ޢަމަލީ މަސައްކަތް އެ ކުންފުނިން ފެށިނަމަވެސް މި އަހަރުގެ އޭޕްރިލް މަހަށްފަހު މަސައްކަތްވަނީ މަޑުޖެހިފައެވެ.

އެހެންކަމުން ފިނޭންސް މިނިސްޓްރީިން މިހާރު ޢިއުލާންކޮށްފައިވަނީ، ހުއްޓިފައިވާ މަސައްކަތްތައް ކުރިއަށްގެންގޮސްދޭނެ ބަޔަކު ހޯދުމަށެވެ. އެގޮތުން މަސައްކަތް ފަށާފައިވާ 34 ގޭގެ މަސައްކަތް ފުރިހަމަކުރުމާއި، މިހާތަނަށް އެއްވެސް މަސައްކަތެއް ނުކޮށްހުރި 66 ގޭގެ މަސައްކަތްތައް ކުރިއަށް ގެންގޮސްދޭނެ ބަޔަކު ހޯދުމަށް ވަނީ އިއުލާނުކޮށްފައެވެ.

މި ޕްރޮޖެކްޓްގައި އަޅާ ގެތަކަކީ 3 ކޮޓަރިއާއި، 3 ފާޚާނާއާއި ސިޓިންގ ރޫމާއި ބަދިގެއާއި، ދޮންނަ މެޝިން ބަހައްޓާ ތަނެއް ހިމެނޭ ގޮތަށް ހަދާ 1100 އަކަފޫޓުގެ ގެތަކެކެވެ. މި ގެތައް ދޫކުރުމަށް ހަމަޖެހިފައިވަނީ މަހަކު 5000 ރުފިޔާއަށް ދިގު މުއްދަތުން ފައިސާ ދައްކާ ގޮތަށެވެ.

މި މަސައްކަތަށް ބީލަން ހުޅުވުން އޮންނާނީ އަންނަ މަހުގެ 12 ވަނަ ދުވަހުއެވެ.