މަގުމަތިން ނަގަނީ ކޮންމެވެސް ބަޔަކު އުކާލާ ކުނިކަމަށާއި އެހެންކަމުން ވެށި ސާފުކޮށް ބޭއްވުމުގައި ފަރުދީ ޒިންމާ އޮތްކަން ޤަބޫލުކުރަންޖެހޭ ކަމަށް ރައީސުލްޖުމްހޫރިއްޔާގެ ނާއިބު ފައިސަލް ނަސީމް މިއަދު ވިދާޅުވެއްޖެއެވެ.

"ވޯލްޑް ކްލީންއަޕް ޑޭ" ފާހަގަކުރުމުގެ ގޮތުން އެޗްޑީސީން އިންޒާމްކުރި "ދުނިޔެ މަގޭ" ޙަރަކާތް ފެށުމުގެ ރަސްމިއްޔާތުގައި ދެއްކެވި ވާހަކަފުޅުގައި ނައިބުރައީސް ފައިސަލް ވިދާޅުވީ މަގުމަތިން ނަގާ ކުންޏަކީ ކޮންމެވެސް ބަޔަކު އުކާލާ ކުނިކަމަށެވެ. އެހެންކަމުން ވެށި ސާފުކުރުމަށް ފަރުދީ ޒިންމާއެއް އޮތްކަން ގަބޫލުކޮށް އެޒިންމާ އަދާކުރުމަށް ނައިބުރައީސް ވަނީ އިލްތިމާސް ކުރަށްވާފައެވެ.

ނައިބުރައީސް ފައިސަލް ނަސީމް މިއަދު ވިދާޅުވީ ރާއްޖޭގައި އަބަދުވެސް ކޮންމެވެސް ސިފައެއްގައި ވެށި ސާފުކުރުމުގެ ޕްރޮގްރާމްތައް ކުރިއަށްގެންދާ ކަމަށެވެ. ޚާއްސަކޮށް ވެށި ސާފުކުރުމުގައި ވެމްކޯގެ މުވައްޒަފުން ކުރާ ބުރަ މަސައްކަތަށް ނައިބް ރައީސް ވަނީ ތަޢުރީފް ކުރަށްވާފައެވެ.

އެޗްޑީސީން މިއަދު ކުރިއަށް ގެންދިޔަ ޙަރަކާތަކީ ދުނިޔެ ސާފުކުރުމުގެ ދުވަހާއި ގުޅިގެން ދުނިޔޭގެ ތިމާވެއްޓަށް އަންނަމުންދާ ބަދަލުތަކާއި، ތިމާވެށި ރައްކާތެރިކުރުމަށް ހޭލުންތެރިކުރުމުގެ ގޮތުން ކުރިއަށްގެންދިޔަ ޙަރަކާތެވެ. މި ޕްރޮގްރާމްގައި ގިނަ ޢަދަދެއްގެ ސްކޫލް ދަރިވަރުންވެސް ވަނީ ބައިވެރިވެފައެވެ.

ދުނިޔޭގެ އެކި ކަންކޮޅުތަކުން ކޮންމެ އަހަރަކުވެސް "ވޯލްޑް ކްލީން އަޕްޑޭ" އާއި ގުޅިގެން ސާފުކުރުމުގެ ހަރަކާތްތައް ކުރިއަށް ގެންދެއެވެ. މިޙަރަކާތް ރާއްޖޭގެ ހުރިހާ ރަށެއްގަައިވެސް މިއަދު ކުރިއަށް ގެންގޮސްފައިވެއެވެ.