ދަނޑުވެރިކަމަށް އައު މޮޑެލެއް ތަޢާރަފްކުރުމަށްޓަކައި، ޒަމާނީ ދަނޑުވެރިކަންކުރުމަށް ވަސީލަތާއެކު އެއް ލައްކަ އަކަފޫޓުގެ ބިން ތަރައްޤީކުރުމަށް ޕްލޭންކޮށްފައިވާކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް އިއުލާން ކުރަށްވައިފިއެވެ.

ދަނޑުވެރިންގެ ދުވަސް ފާހަގަކުރުމަށް މާލެ އަތޮޅު ކާށިދޫގައި މިރޭ ބޭއްވި ރަސްމީ ޖަލްސާގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވީ، ދަނޑުވެރިކަމުގެ އާ މޮޑެލެއް 3 އަތޮޅެއްގެ ފަސް ރަށެއްގައި ފެށުމަށް ސަރުކާރުގެ ދަނޑުވެރިކަމުގެ ކުންފުނި، އެގްރޯ ކުންފުނިން ތައްޔާރުވަމުން އަންނަކަމަށެވެ. އެއީ ކާށިދޫގެ އިތުރުން ނ. މަނަދުއާއި އެ އަތޮޅު ލަންދުއާއި މާފަރު އަދި ލ. އަތޮޅު އިސްދޫއެވެ.

ރައީސް ސާލިޙު ވިދާޅުވީ މިއިން ކޮންމެ ރަށެއްގައި ޒަމާނީ ދަނޑުވެރިކަމުގެ ވަސީލަތްތަކާއެކު، އެއް ލައްކަ އަކަފޫޓުގެ ބިން ތަރައްޤީކުރުމަށް މިހާރު އޮތީ ޕްލޭންކޮށްފައިކަމަށެވެ.

pic.twitter.com/rCAHUwGlpE

— The President's Office (@presidencymv) October 16, 2022

މީގެ އިތުރުން ރައީސް ސާލިޙު ވިދާޅުވީ މުޅި ރާއްޖެއަށް ބަލާއިރު ދަނޑުވެރި އުފެއްދުންތައް މާކެޓް ކުރުމަކީ އަދިވެސް ވަރަށް ބޮޑު ގޮންޖެހުމެއް ކަމަށެވެ. އެހެންކަމުންް އެގްރޯ ނޭޝަނަލް ކޯޕަރޭޝަން އުފައްދައި ދަނޑުވެރިންނަށް ކާބޯތަކެތި ބާޒާރަށް ނެރުމަށް ފަސޭހަކޮށް ތާޒާކަމާއެކު ދަނޑުވެރިން އުފައްދާ ބާވަތްތައް ބާޒާރަށް ނެރުމުގެ މަސައްކަތްކުރަމުން އަންނަ ކަމަށް ރައީސް ވިދާޅުވިއެެވެ.

އޭގެ ދަށުން 9 ރަށެއްގައި އެ ކުންފުނިން މިހާރު ވެސް ޑިސްޓްރިބިއުޝަން ސެންޓަރާ އެކު އަވިން އުފައްދާ ހަކަތައިން ފިނިކޮށްދޭ ކޯލްޑް ސްޓޯރޭޖް ފެސިލިޓީ ގާއިމުކޮށްފައިވާ ކަން އެމަނިކުފާނު ފާހަގަކުރެއްވި އެވެ. ރައީސް ސާލިޙު ވިދާޅުވީ އެ ތަންތަން ލަސްތަކެއް ނުވެ ހުޅުވޭނެ ކަމަށެވެ. އެއާއެކު އެ ކުންފުނީގެ ހިދުމަތް އިތުރަށް ފުޅާވާނެ ކަމަށް ރައީސް ވިދާޅުވިއެވެ. ރައީސް ވަނީ ދަނޑުވެރިންނަށް ރަނގަޅު ގޮތްތައް ހޯދައި ދިނުމުގައި ދެމިތިބޭނެކަމުގެ ޔަޤީންކަން ދަނޑުވެރިންނަށް ދެއްވާފައެވެ.