ޚާއްސައެހީއަށް ބޭނުންވާ 15 އަހަރުގެ އަންހެން ކުއްޖަކާ ބެހުނު ޅިޔަނު 18 އަހަރު ދުވަހަށް ޖަލަށްލުމަށް ކްރިމިނަލް ކޯޓުން ހުކުމްކޮށްފިއެވެ.

އިތުބާރު ކުރެވޭ މަގާމެއްގައި ހުރެ ކުޑަކުއްޖަކާ މެދު ޖިންސީ އަމަލެއް ހިންގުމުގެ ދައުވާ ސާބިތުވެ ހުކުމްކޮށްފައި ވަނީ ފ. ފީއަލި ފީރޯޒްގެ، އިބްރާހީމް ޝާފިއުގެ މައްޗަށެވެ. އޭނާއަކީ ޖިންސީ އަނިޔާގެ ޝިކާރައަކަށްވި ކުއްޖާގެ ޅިޔަނެވެ.

ކްރިމިނަލް ކޯޓުން އެ މައްސަލައިގައި އިއްޔެ ހުކުމްކޮށްފައި ވަނީ އޭނާ 18 އަހަރަށް ޖަލަށްލުމަަށެވެ. ނަމަވެސް ބަންދުގައި އޭނާ ހޭދަކުރި ދެ އަހަރާއި ތިން މަހާއި 19 ދުވަސް އުނިކުރުމުން ޙުކުމުގައި އޭނާ ތަންފީޒުކުރަން ޖެހެނީ 15 އަހަރާއި އަށް މަހާއި 11 ދުވަހެވެ.

ދައުލަތުން އޭނާގެ މައްޗަށް ދަޢުވާ ކޮށްފައިވަނީ 2020 ވަނަ އަހަރުގެ ކުރީކޮޅު ތިން ދުވަހެއްގެ މަތިން އެ ކުއްޖާއަށް ޖިންސީގޯނާ ކޮށްފައިވާތީއެވެ. އެގޮތުން އޭނާގެ ގޯއްޗެއްގައި ހަދާފައިހުރި ކޮޓަރިއަކަށް އެކުއްޖާ ގެންގޮސްގެން ޖިންސީ ގޯނާ ކުރުމުގެ އިތުރުން އޭނާ ދިރިއުޅެމުން ދިޔަ އެ ކުއްޖާގެ އާއިލީ ގޭގެ ކޮޓަރިއެއް ތެރޭގައި ވެސް ޖިންސީ ގޯނާ ކޮށްފައިވާ ކަމަށް ދަޢުވާގައިވެއެވެ.

ޖިންސީގޯނާ ކުރުމުގެ ސަބަބުން އެކުއްޖާ ބަލިވެއިންކަމަށް މީޑިއާތަކުން އެދުވަސްވަރު ރިޕޯޓުކޮށްފައިވެއެވެ.