މާލެ އާއި ވިލިމާލޭގެ މަގުތަކާއި، ހުސްބިންތައް އަދި މައިޒާންތައް ސާފުތާހިރު ތަނެއްގޮތުގައި ބޭއްވުމަށް ސިޓީ ކައުންސިލުން އިލްތިމާސްކޮށްފިއެވެ.

މާލެ ސިޓީ ކައުންސިލާއި ވެމްކޯއާއެކު ފަސް އަހަރު ދުވަހުގެ މުއްދަތަކަށް ވެފައިވާ އެއްބަސްވުމުގެ މުއްދަތު ހަމަވުމުން، މިއަދުން ފެށިގެން ވެމްކޯއިން މާލޭގެ މަގުތައް ކުނިކަހައި ސާފު ނުކުރާނެ ކަމަށް އެކުންފުނިން ވަނީ ބުނެފައެވެ.

އެކަމާގުޅިގެން ސިޓީ ކައުންސިލުން ބުނީ މާލެއާއި ވިލިމާލޭގެ މަގުތަކާއި، ޕާކުތަކާއި، ހުސްބިންތަކާއި، މައިޒާންތަކާ އަދި ތިމާ ދިރިއުޅޭ ވެށި ސާފުތާހިރު ތަނެއްގޮތުގައި ބޭއްވުމަކީ އެންމެހައި ރައްޔިތުންގެ ފަރުދީޒިންމާއެއް ކަމުގައި ދެކި އެފަދަ ތަންތަން ސާފުތާހިރު ތަނެއްގެގޮތުގައި ބޭއްވުމަށް ދަންނަވާ ކަަމަށެވެ.

ހަމައެއާއެކު ކުނިމެނޭޖު ކުރުމުގެ ޤަވާޢިދާ އެއްގޮތަށް ޢަމަލުކުރުމަށާއި ކުނި މަގުމައްޗަށް ނެރުމުގެ ބަދަލުގައި ޚިދުމަތްދޭ ފަރާތްތަށް މެދުވެރިކޮށް ކުނި އުކާލެވެންދެން ރައްކާތެރިކަމާއެކު ބެހެއްޓުމަށް ކައުންސިލުން އިލްތިމާސްކޮށްފައިވެއެވެ.

ސިޓީ ކައުންސިލުން މިއަދު ބުނީ ކުނިމެނޭޖް ކުރުމުގެ ޤަވާޢިދާ ޚިލާފުވާ ފަރާތްތަކާއިމެދު އެ ޤަވާޢިދާ އެއްގޮތަށް އަމަލު ކުރާނެ ކަމަށެވެ.

ވެމްކޯއާ އެކު ވެފައިވާ އެއްބަސްވުމުގެ މުއްދަތު ހަމަވި އިރުވެސް އެ އެއްބަސްވުން އާ ނުކުރަން މާލެ ސިޓީ ކައުންސިލުން ނިންމީ، މާލެ ސަރަހައްދުގައި ކުނިކަހައި ސާފު ކުރުމާއި ކުނިނެގުން ފަދަ ކަންކަން ކުރުމުގައި ލަސްތަކެއް އުޅޭތީ އާއި އެފަދަ ޝަކުވާތައް މާލެ ސިޓީ ކައުންސިލަށް ލިބެމުން އަންނާތީ ކަމަށް މީގެ ކުރިން ކައުންސިލުން ވަނީ ބުނެފައެވެ.