ހުޅުމާލޭގައި އެޅި ސަރުކާރުގެ އޮފީސް އިމާރާތް، ރައީސް އިބްރާހިމް މުހައްމަދު ޞާލިޙް މިއަދު ހުޅުވައިދެއްވައިފިއެވެ.

ޖުމްލަ 185 މިލިއަން ރުފިޔާ ހަރަދުކޮށްގެން ހުޅުމާލޭގައި ތަރައްޤީކުރި އޮފީސް އިމާރާތަށް ނަން ދީފައިވަނީ ކުރީގެ ޕަބްލިކް ވޯކްސް މިނިސްޓަރ އުމަރު ޒާހިރަށް ނިސްބަތްކޮށެވެ.

ހުޅުމާލޭގައި މިއަދު ހެނދުނު ބޭއްވި ޚާއްސަ ރަސްމިއްޔާތެއްގައި، 'އުމަރު ޒާހިރު އޮފީސް ބިލްޑިން'ގެ ޤައުމީ ދިދަ ނަންގަވައިދެއްވީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙެވެ.

ސަރުކާރުގެ ތިން މިނިސްޓްރީއެއްގެ އިތުރުން އަލަށް ރާއްޖޭގައި ގާއިމްކުރާ އެމެރިކާ އެމްބަސީ ހުޅުވަން ހަމަޖެހިފައިވަނީ ވެސް އެ އިމާރާތުގައެވެ. އެ އިމާރާތަށް ބަދަލުކުރާ މިނިސްޓްރީތަކަކީ، ޓްރާންސްޕޯޓް މިނިސްޓްރީ، ހަޔާ އެޑިއުކޭޝަން މިނިސްޓްރީ އަދި ޖެންޑާ މިނިސްޓްރީއެވެ.

ސަރުކާރުން ނިންމާފައިވަނީ މާލޭގައި ކުއްޔަށް ހިންގަމުން އަންނަ އޮފީސް އިމާރާތްތައް އެތަނަށް ބަދަލު ކަމަށެވެ.

ހުޅުމާލޭގެ ހައިވޭ ހެދި ކުންފުންޏާއި ހަވާލުކޮށްގެން އިމާރާތްކުރި އެ އިމާރާތުގެ މަސައްކަތް ހަވާލުކުރީ އެއް އަހަރު ދުވަހުގެ ތެރޭގައި ނިންމާ ގޮތަށެވެ. ނަމަވެސް، ކޮވިޑާއި ގުޅިގެން މަސައްކަތް ހުއްޓި، ކުރިން އަންދާޒާކުރި މުއްދަތަށްވުރެ ގިނަ ދުވަސްވަނީ ހޭދަވެފައެވެ.

ސަރުކާރުގެ އިދާރާތައް އެއްފުރާޅެއްގެ ދަށަށް ގެނެސް، ހިދުމަތް ހޯދުމުގައި ރައްޔިތުންނަށް ލުއިފަސޭހަ ގޮތްތައް ހޯދައިދިނުމަކީ ސަރުކާރުން އިސްކަމެއްދޭ ކަމެއްކަމަށް ހައުސިން މިނިސްޓްރީން މަޢުލޫމާތުދެއެވެ.