މާފުށީ ޖަލުގައި ހައި ސެކިއުރިޓީ ވިންގެއް ޤާއިމު ކުރުމުގެ މަސައްކަތް ކުރިއަށްދާކަމަށް ދާޚިލީ ވަޒީރު އިމްރާން ޢަބްދުﷲ މިއަދު ވިދާޅުވެއްޖެއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި މިނިސްޓަރ އިމްރާން ވަނީ، ޖަލުތަކުގައި ހަރުކަށި ފިކުރު މޫލާފައިވާކަމަށާއި އެކަން ޙައްލު ކުރުމަށް ސަރުކާރުން ގިނަ މަސައްކަތްތަކެއް ކުރަމުންގެންދާ ކަމަށް ވިދާޅުވެފައެވެ.

އެގޮތުން މާފުށީ ޖަލުގައި ހައި ސެކިއުރިޓީ ވިންގެއް ޤާއިމުކުރުމުގެ މަސައްކަތް ކުރަށްވަމުން ގެންދަވާކަމަށް އިމްރާން ވިދާޅުވިއެވެ. އަދި އެމަސައްކަތް ކުރަށްވަމުން ގެންދަވަނީ ސިންގަޕޫރުގައި އެފަދަ ޖަލުތައް ހަދާފައިވާގޮތުގެ ނަމޫނާތައް ބައްލަވައިގެން ކަމަށާއި، އެމަސައްކަތް މިއަހަރުގެ މެދުތެރެއަށް ނިންމާލެވޭނެ ކަމަށްވެސް އިމްރާން މިއަދު ވިދާޅުވިއެވެ.

"އެފަދަ ފަރާތްތައް ބައިތިއްބާނެ ހައި ސެކިއުރިޓީ ވިންގެއް މާފުށީ ޖަލުގައި ޑިވޮލޮޕްކުރުމުގެ މަސައްކަތް ފެށިގެން ދަނީ ކުރިއަށް." އިމްރާން ވިދާޅުވިއެވެ.

އިމްރާން ވިދާޅުވީ، ހަރުކަށި ފިކުރުގެ މީހުންގެ ސަބަބުން ޖަލުގެ ނިޒާމަށް ބުރޫ އަރާ އެތައް ކަމެއް ކުރިމަތިވަމުންދާ ކަމަށެވެ. އެގޮތުން ރޭގައިވެސް ހޭލާތިބެން ޖެހޭފަދަ ހާދިސާތަކެއް ދިމާވި ކަމަށް އިމްރާން މިއަދު ވިދާޅުވިއެވެ.

މީގެ ކުރިން ކޮމިޝަނަރ އޮފް ޕްރިޒަންސް އަޙްމަދު މުޙައްމަދުފުޅުވެސް ވިދާޅުވެފައިވަނީ ހަރުކަށި ފިކުރުގެ ފަރާތްތަކުން ރާއްޖޭގެ ޖަލުތަކުން މީހުން ރެކްރޫޓްކުރަމުން ގެންދާކަން ފާހަގަކުރެވިފައިވާ ކަމަށެވެ.