ލ.މާބައިދޫގައި އައިސް ޕްލާންޓެއް ޤާއިމްކޮށް ހިންގުން ފެނަކަ ކޯޕަރޭޝަނާއި ހަވާލުކޮށްފިއެވެ.

‏ލ. މާބައިދޫގައި 25 ޓަނުގެ އައިސް ޕްލާންޓެއް ޤާއިމްކޮށް ހިންގުމަށް ފެނަކަ ކޯޕަރޭޝަން ލިމިޓެޑާއި ހަވާލުކޮށްފައިވަނީ އެކަމަށްޓަކައި މިއަދު ބޭއްވި ރަސްމިއްޔާތެއްގައެވެ.

ފެނަކަ ކޯރޕަރޭޝަންގެ ފަރާތުން މިކަމާއި ގުޅޭ އެއްބަސްވުމުގައި ސޮއިކުރެއްވީ އެކުންފުނީގެ މެނޭޖިންގ ޑިރެކްޓަރ އަޙްމަދު ސައީދު މުޙައްމަދެވެ. އަދި މާބައިދޫ ކައުންސިލްގެ ފަރާތުން ސޮއިކުރެއްވީ ކައުންސިލްގެ ރައީސް އިބްރާހީމް ވިސާމެވެ.

ލ. މާބައިދޫގައި 25 ޓަނުގެ އައިސް ޕްލާންޓެއް ޤާއިމްކޮށް ހިންގުމަށް ފެނަކަ ކޯޕަރޭޝަން ލިމިޓެޑާއި ހަވާލުކުރުމަށް ވެވޭ އެއްބަސްވުމުގައި މިއަދު ވަނީ ސޮއިކުރެވިފައި. pic.twitter.com/kA8gVSmFcw

— Fenaka Corporation Ltd (@TeamFenaka) February 19, 2023

މާބައިދޫގައި އައިސް ޕްލާންޓު ތަރައްޤީކުރުމުގެ މަސައްކަތް ފެނަކައާ ހަވާލުކޮށްފައިވަނީ، 6 މަސްދުވަހުގެ ތެރޭގައި ނިންމާގޮތަށެވެ.

ފެނަކަ ކޯޕަރޭޝަނުން އަންނަނީ ރާއްޖޭގެ އެކި ސަރަހައްދުތަކުގައި ފެންވަރު ރަނގަޅު ކަރަންޓްގެ ހިދުމަތް ދިނުމުގެ އިތުރުން، އައިސް ޕްލާންޓްވެސް ގާއިމްކޮށް ހިދުމަތް ދެމުންނެވެ. މިކަމުގެ ސަބަބުން މަސްވެރިންނަށް އަންނަނި ބޮޑެތި ފަސޭހަތަކެއް ލިބެމުންކަން ފާހަގަކޮށްލެވެއެވެ.