ޖުމްހޫރީ ޕާޓީގެ ޑެޕިއުޓީ ލީޑަރުގެ މަގާމަށް ވަރަށް ބޮޑު ވާދަވެރި ކަމެއް އުފެދިއްޖެއެވެ.

މި މަހުގެ 24، 25 ގައި ބާއްވާ ޖުމުހޫރީ ޕާޓީގެ ކޮންގްރެސްގައި އާ ދައުރަށް ޕާޓީގެ މަގާމުތަކަށް ކުރިމަތިލުމުގެ ފުރުސަތު ވަނީ ހުޅުވާލާފައެވެ. އެގޮތުން ޖުމުހޫރީ ޕާޓީގެ ޑެޕިއުޓީ ލީޑަރު ކަމަށް ހުޅުވާލި ފުރުސަތު އިއްޔެ ވަނީ ހަމަވެފައެވެ.

މުއްދަތު ހަމަވިއިރު އެމަގާމަށް 12 ބޭފުޅުން ވަނީ ކުރިމަތިލައްވާފައެވެ. ޖުމުހޫރީ ޕާޓީގެ ކައުންސިލަށް އިންތިޚާބުކުރާ ފަސް ނައިބް ލީޑަރުންގެ މަގާމަށް ކުރިމަތިލެއްވި ބޭފުޅުންގެ ތެރޭގައި ޖުމުހޫރީ ޕާޓީގެ ލީޑަރު ގާސިމް އިބްރާހިމްގެ އަނބިކަބަލުން އަދި ޓްރާންސްޕޯޓް މިނިސްޓަރު އާއިޝަތު ނަހުލާއާއި އެޕާޓީގެ މިހާރުގެ ނާއިބު ލީޑަރު އަމީން އިބްރާހިމާއި މިހާރުގެ ނާއިބު ރައީސް އަހުމަދު ސައުދްއި ސްޓޭޓް މިނިސްޓަރު ހަސަން މުޣުނީއާއި ފެނަކައިގެ ކުރީގެ ޗެއާމަން އިގްބާލް އާދަމާއި ފުވައްމުލަކު އުތުރު ދާއިރާގެ ކުރީގެ މެންބަރު އަލީ ޝާޙާއި ތިނަދޫ އުތުރު ދާއިރާގެ ކުރީގެ މެންބަރު އަބްދުﷲ އަހުމަދާއި ތިނަދޫ އުތުރު ދާއިރާގެ ކުރީގެ މެންބަރު އަބްދުﷲ އަހުމަދާއި މިހާރުގެ ނާއިބު ލީޑަރު ފިޝަރީޒް މިނިސްޓަރު ޑރ. ހުސައިން ރަޝީދު ހަސަނާއި ކޮންޓްރޯލާ އޮފް އިމިގްރޭޝަން އަހްމަދު މުހައްމަދު (ހަނަފީ) އާއި އިސްދޫ ދާއިރާގެ މެންބަރު އަލީ ހަމީދާއި ކެޔޮދޫ ދާއިރާގެ ކުރީގެ މެންބަރު މޫސާ ނިޒާރު އިބްރާހިމާއި ޔަޝްފާ އަބްދުލްޣަނީ ހިމެނިވަޑައިގަންނަވައެވެ.

އެބޭފުޅުންގެ ނަންތައް ރޭ ވަނީ ތަރުތީބުކޮށްފައެވެ.

ޖުމުހޫރީ ޕާޓީގެ ޑެޕިއުޓީ ލީޑަރުގެ މަގާމުގެ އިތުރުން ކައުންސިލަށް ހޮވާ މެންބަރު ކަމުގެ 25 މަގާމަށްވެސް ގިނަ ބަޔަކު ވަނީ ކުރިމަތިލާފައެވެ. އެ ގޮތުން އެ މަގާމަށް 65 މެންބަރަކު ކުރިމަތިލާފައިވާ ކަމަށް ޖުމުހޫރީ ޕާޓީން ބުނެއެވެ.

ޖުމްހޫރީ ޕާޓީގެ ލީޑަރުގެ މަގާމަށް އިންތިޚާބަކާއި ނުލައި އެޕާޓީގެ ލީޑަރު މަގާމުގައި މިވަގުތު ވެސް ހުންނެވި ގާސިމް ވަނީ އިންތިޚާބުވެވަޑައިގެންފައެވެ.