ގަވަމަންޓް އީ-ލެޓަރ މެނޭޖްމަންޓް ސިސްޓަމް، ޖެމްސްއިން ޑިޖިޓަލް ސޮއި މި މަހުގެ ފަހުކޮޅު ޓެސްޓްކުރަން ތައްޔާރުވާން ފަށައިފި އެވެ.

ގަވަމަންޓް އީ-ލެޓަރ މެނޭޖްމަންޓް ސިސްޓަމް(ޖެމްސް) އިފްތިތާޙުކޮށްފައިވަނީ 2010 ވަނަ އަހަރުގައެވެ. މިވަޞީލަތާއެކު ސަރުކާރުގެ އެކި އިދާރާތަކުން ލިޔެކިޔުންތައް ޑެލިވަރކުރުމަށް އުފުލި ބުރައަށްވަނީ ނިމުމެއް އައިސްފައެވެ.

ޖެމްސް އިން ބުނީ ޑިޖިޓަލް ސޮއި ތަޢާރަފްކުރުން ވެގެންދާނީ ސޮއިކުރުމަށް ގެނެވޭ އިންގިލާބީ ބަދަލަކަށް ކަމަށެވެ. އަދި މި މަހުގެ ފަހުކޮޅު ޑިޖިޓަލް ސޮއިކުރުމަށް ޓެސްޓްކުރަން ތައްޔާރީތައް ވަމުން އަންނަ ކަމަށް ބުނުން ފިޔަވައި އިތުރު ތަފުސީލެއް ޖެމްސްއިން ދީފައެއް ނުވެއެވެ.

ސޮއި ކުރުމަށް އިންގިލާބެއް! މިމަހު ފަހުކޮޅު ތަޖުރިބާ ކުރަން ފަށަން މިދަނީ ތައްޔާރުވަމުން.
#gemsmv #digitaltransformation #digitalmaldives pic.twitter.com/xMz9mavDvg

— GEMS (@Gemsmv) March 1, 2023

ޖެމްސްގެ މަޤްސަދަކީ ސަރުކާރުގެ އިދާރާތަކުގެ މެދުގައި ބަދަލުކުރެވޭ ލިޔެކިޔުންތައް ޑިޖިޓަލް މަންސައެއް މެދުވެރިކޮށް ބަދަލުކުރެވޭނެ ނިޒާމެއް ޤާއިމުކުރުމެވެ. އެގޮތުން ހިދުމަތްތައް ޑިޖިޓަލައިޒްކުރުމަކީ ސަރުކާރުގެ އެންމެ ބޮޑު އެއް އަމާޒެވެ.

ސަރުކާރުގެ އެއްއޮފީހުން އަނެއް އޮފީހަށް ސިޓީ ފޮނުވުމުގެ ބަދަލުގައި ލިޔެކިޔުން ހިއްސާކުރެވޭނެ މަގު 2021 ވަނަ އަހަރުގެ ތެރޭގައި ބޭނުންކުރަން ފެށި ގަވަމަންޓް އީ-ލެޓަރ މެނޭޖްމަންޓް ސިސްޓަމް (ޖެމްސް) މެދުވެރިކޮށް މިހާރުވަނީ ފަހިކޮށްފައެވެ. އެގޮތުން މިދިޔަ ފެބްރުއަރީ މަހުގެ ދެވަނަ ހަފްތާގެ ނިޔަލަށް 512 އިދާރާއަކުންވަނީ 9304549 ފަހަރު މިނިޒާމުގެތެރެއިން އެކި މުޢާމަލާތްތައްކޮށްފައެވެ.