ތިލަފުށީ ކުޑަގިރިއަށް އެރި އިންޑިއާ ބޯޓެއް 3.9 މިލިއަން ރުފިޔާއިން ޖޫރިނަމާކޮށްފިއެވެ.

އެންވަޔަރަމަންޓް ޕްރޮޓެކްޝަން އޭޖެންސީ، އީޕީއޭއިން ޖޫރިމަނާކޮށްފައިވަނީ ބާދަގަނޑުތަކެއް ބަރުކޮށްގެން ދަތުރުކުރި "އެމްސީވީ. މާރިއާ ސިންތަޔަތިރައި ރިޔަނަ" ނަމަކަށް ކިޔާ ބޯޓެކެވެ. މި ބޯޓު ތިލަފުށީ ކުޑަގިރި ފަރަށް އަރާފައިވަނީ މިދިޔަ ޖެނުއަރީމަހުގެ 31 ވަނަ ދުވަހުއެވެ.

އީޕީއޭ އިން ބުނީ، ބޯޓު ފަރަށްއެރި ސަރަޙައްދުގެ ތިމާވެށްޓަށް ލިބުނު ގެއްލުންތައް ބެލުމަށް ބޯޓުގެ ވެރިފަރާތުން ސާރވޭކޮށް، ސާރވޭ ރިޕޯޓު އީ.ޕީ.އޭއާ ޙިއްސާކޮށްފައިވާކަމަށެވެ. ހަމައެއާއެކު އީޕީއޭ އިންވެސް އެ ސަރަޙައްދު ސާރވޭ ކޮށްފައިވާކަމަށްވެސް އީޕީއޭ އިން ބުނެފައިވެއެވެ.

އެ އުޅަނދު ތިލަފުށީ ކުޑަގިރި ފަރަށް އެރުމުގެ ސަބަބުން 130 އަކަމީޓަރުގެ ސަރަޙައްދަކަށް އެކިވަރުގެ ގެއްލުން ލިބިފައިވާކަން ސާރވޭ ރިޕޯޓުން އެންގޭ ކަމަށް އީޕީއޭ އިން ވަނީ ބުނެފައެވެ.

އެހެންކަމުން ތިމާވެށްޓަށްދޭ ގެއްލުންތަކަށް ޖޫރިމަނާ ކަނޑައެޅުމާއި ބަދަލު ހޯދުމުގެ ޤަވާއިދުގެ ދަށުން އުޅަނދުގެ ވެރިފަރާތް ތިން މިލިއަން ނުވަދިހަ އަށްހާސް ހަތްސަތޭކަ ދިހަރުފިޔާއިން ޖޫރިމަނާ ކޮށްފައިވާ ކަމަށް އީޕީއޭ އިން ވަނީ ބުނެފައެވެ.

އީޕީއޭ އިން އުޅަނދުގެ ވެރިފަރާތަށް އަންގާފައިވަނީ ޖޫރިމަނާ ފައިސާ 30 ދުވަހުގެ ތެރޭގައި އީ.ޕީ.އޭއަށް ދައްކައި ޚަލާސްކުރުމަށެވެ.