ރާއްޖެ އާއި އިޒްރޭލާ ދެމެދު އެއަރ ސާވިސް އެގްރީމަންޓެއްނެތް ކަމަށް ރައީސް އޮފީހުގެ ތަރުޖަމާނު މިއުވާން މުޙައްމަދު ވިދާޅުވެއްޖެއެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިންނަށް މަޢުލޫމާތު ދެއްވަމުން ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވީ، ރާއްޖެ އާއި އިޒްރޭލާ ދެމެދު އެއާ ސާވިސް އެގްރީމަންޓެއް ނޯންނާނެ ކަމަށެވެ. ހަމައެއާއެކު ރާއްޖެއާއި އިޒްރޭލާ ދެމެދު ވިޔަފާރީގެ ގުޅުމެއް ނެތް ކަމަށްވެސް މިއުވާން މިއަދު ވިދާޅުވިއެވެ.

މިއުވާން ވިދާޅުވީ އިޒްރޭލުގެ ޤައުމީ އެއަރލައިން އެލް އަލްގެ ދަތުރުތައް ރާއްޖެއަށް ފެށުމަށް ރާވަމުންދާ ކަމަށް އެ އެއާލައިނުން ބުނި ނަމަވެސް، އެފަދަ ހުށަހެޅުމެއް އެ އެއާލައިނުން ދިވެހި ސަރުކާރަށް ހުށައަޅާފައި ނުވާކަމަށެވެ. އަދި އެފަދަ ހުށައެޅުމެއް ލިބުނު ނަމަވެސް އެއީ ސަރުކާރުން ބަލައިގަންނާނެ ކަމެއް ނޫންކަމަށްވެސް މިއުވާން ވިދާޅުވިއެވެ.

މިއުވާން މި މޭރުމުން ވިދާޅުވެފައިވާއިރު އެލް އަލް އެއާލައިންއާ ޙަވާލާދީ ބައިނަލް އަޤުވާމީ މީޑިއާތަކުން ރިޕޯޓު ކޮށްފައިވަނީ، އެ އެއާލައިނުން އަލަށް ދަތުރުތައް ފަށާ ގައުމުގެ ތެރޭގައި ރާއްޖެ ހިމެނޭ ކަމަށެވެ. އެކަމާ ގުޅިގެން މިއުވާން ވިދާޅުވީ ބަޔަކަށް އެބަޔަކު ކަމެއް ކުރުމަށް ޝައުޤުވެރިކަން ހުރިވާހަކަ ދެއްކިދާނެ ކަމަށާއި ނަމަވެސް ސަރުކާރުން އޮތީ އެހުއްދަ އިޒްރޭލުގެ ޤައުމީ އެއަރލައިނަށް ދޭގޮތަށް ނޫން ކަމަށެވެ.

ރާއްޖެއާއި އިސްރާއީލާ ދެމެދު ސީދާ ދަތުރުތައް ނެތް ނަމަވެސް، ޓްރާންސިޓް ފްލައިޓް ތަކުން ރާއްޖެއަށް އިސްރާއީލުގެ ފަތުރުވެރިން އާދެއެވެ. އަދި އެގައުމުގެ މީހުންނަށް ރާއްޖެއަށް އައިސް އުޅުމަކީ މަނާކަމެއް ނޫނެވެ.