ޓައިމްލައިނަށް ކުޑަ ބަދަލެއް އައިނަމަވެސް 4 ރަށެއްގައި ހޮސްޕިޓަލް އެޅުމުގެ މަޝްރޫޢުތައް ކުރިއަށް ދާނެ ކަމަށް ސަރުކާރުން ހާމަކޮށްފިއެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިންނަށް މަޢުލޫމާތު ދެއްވަމުން ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވީ 4 ރަށެއްގެ ހޮސްޕިޓަލްގެ އާ އިމާރާތް ޑިޒައިން ކުރުމާއި ކޮންސްޓްރަކްޝަން މަސައްކަތް ފެށުމުގައި ލަސްތަކެއް ހުރިނަމަވެސް ސަރުކާރުން ކަނޑައަޅާފައިވާ ގޮތަށް އެ މަސައްކަތްތައް ކުރިއަށްދާނެ ކަމަށެވެ.

އެޕްރޮޖެކްޓްގެ ޢަމަލީ މަސައްކަތްތައް އަދިވެސް ފެށިފައި ނުވާތީ ނޫސްވެރިއަކު ކުރެއްވި ސުވާލަކަށް ޖަވާބު ދެއްވަމުން މިއުވާން މިއަދު ވިދާޅުވީ، ހޮސްޕިޓަލްތަކުގެ މަސައްކަތް ހިމެނޭހެން ސަރުކާރުން ކުރިއަށް ގެންދިއުމަށް ރޭވި ބައެއް މަޝްރޫޢުތައް ލަސްވެގެންދިޔައީ ދުނިޔޭގެ ބާޒާރުގައި ތަކެތީގެ އަގަށް އައި ބަދަލާއި، ކޮވިޑަށްފަހު އިރުމަތީ ޔޫރަޕުގެ ހަނގުރާމައިގެ ސަބަބުން ކަމަށެވެ. މިއުވާން ވިދާޅުވީ މީގެކުރިން ލަފާކުރެވިފައިނެތް ބޮޑެތި ގޮންޖެހުންތައް ކުރިމަތިވުމުގެ ސަބަބުން މަޝްރޫޢުތަކަށް ބޭނުންވާ ސާމާނު ގެނައުމުގައި ދަތިތަކާ ކުރިމަތިވި ކަމަށެވެ.

"ތަރައްގީގެ އެކިއެކި މަޝްރޫއުތައް އަތޮޅުތެރޭގައި މިހިންގާ މަޝްރޫއުތައްވެސް ކޮންމެވެސް ވަރަކަށް ޓައިމްލައިންތަކަށް ބަދަލުތަކެއް އައިކަމުގައިވީ ނަމަވެސް ކަނޑައެޅިފައިވާ މަޝްރޫއުތައް ހުއްޓުމެއްނެތި ކުރިއަށްދާނެ،" މިއުވާން ވިދާޅުވި އެވެ.

ސަރުކާރުން ހއ.ދިއްދޫ އަތޮޅު ހޮސްޕިޓަލާއި، ރ.އަލިފުށި ހޮސްޕިޓަލާއި، ދ.ކުޑަހުވަދޫ އަތޮޅު ހޮސްޕިޓަލް އަދި ގއ.ވިލިނގިލީ އަތޮޅު ހޮސްޕިޓަލްގެ މަސައްކަތް 882 މިލިއަން ރުފިޔާއަށް މިދިޔަ އަހަރުގެ މެއި މަހުގެ ތެރޭގައި ހަވާލުކޮށްފައިވަނީ އިންޑިއާގެ ޓެލެކޮމިއުނިކޭޝަން ކޮންސަލްޓެންޓްސް އިންޑިއާ ލިމިޓެޑާއެވެ. މި މަޝްރޫއަށް ފައިނޭންސް ކުރަނީ އިންޑިއާގެ އެގްޒިމް ބޭންކުން ލޯނެއް ނަގައިގެންނެވެ.