މިހާރު ބޭނުންކުރަމުންދާ ދިވެހި ރައްޔިތެއްކަން އަންގައިދޭ ކާޑުގެ ބަދަލުގައި އައު އައިޑީ ކާޑެއް ޑިޒައިން ކުރުމުގެ މަސައްކަތް ސަރުކާރުން ބަޔަކާއި ޙަވާލުކޮށްފިއެވެ.

ޑިޕާޓްމަންޓް އޮފް ނޭޝަނަލް ރެޖިސްޓްރޭޝަން، ޑީއެންއާރުން ވަނީ މިހާރު ބޭނުންކުރާ ދިވެހި ރައްޔިތެއްކަން އަންގައިދޭ ކާޑުގެ ޑިޒައިން ބަދަލުކޮށް ސަލާމަތީގޮތުން ފުރިހަމަ، ޒަމާނީ ސެކިއުރިޓީ ފީޗާރސްތައް ހިމެނޭ ސްމާޓް އައި.ޑީ ކާޑެއް ތަޢާރަފުކުރުމަށް އެންކްރިއާ ޕްރައިވެޓް ލިމިޓެޑާ ޙަވާލުކޮށްފައެވެ.

އެންކްރިއާ ޕްރައިވެޓް ލިމިޓެޑަކީ އެންމެ ފަހުން އޮތް ސާފް ޗެންޕިއަންޝިޕްގެ ބްރޭޑިން ތައްޔާރު ކުރި ދިވެހި ޑިޒައިނަރުންގެ ކުންފުންޏެކެވެ. އެކުންފުނިން ވަނީ އައިޑީ ކާޑު ފަރުމާ ކުރުމަށް ހުޅުވާލި ފުރުސަތުގައި ހުށަހެޅި ޑިޒައިންތަކުގެ ތެރެއިން އެއްވަނަ ހޯދާފައެވެ.

ޑީއެންއާރުން ވަނީ ޑިޒައިނަށް ބަދަލު ގެނައުމަށް "އެންކްރިއާ ޕްރައިވެޓް ލިމިޓެޑް" ހަވާލު ކުރުމަށް އެއްބަސްވުމުގައި މިހާރު ސޮއި ކޮށްފައެވެ.

ދިވެހި ރައްޔިތެއްކަން އަންގައިދޭ ކާޑުގެ ޑިޒައިނަށް ބަދަލުގެނައުމަށް ނިންމާފައިވާއިރު ސަރުކާރުން ވަނީ ރާއްޖޭގައި ޑިޖިޓަލް އައިޑީކާޑު ބޭނުންކުރަން ނިންމައި މިމަހުން ފެށިގެން ޑިޖިޓަލް އައިޑީ ތަޖުރިބާކުރުމުގެ ފުރުސަތު ހުޅުވާލާފައެވެ.

ޑިޖިޓަލް އައިޑެންޓިޓީ ކާޑަކީ ސެކިއުރިޓީ ގިނަ ފީޗާތަކެއް ހިމެނޭނެ ކާޑެކެވެ. ޑިޖިޓަލް އައިޑެންޓިޓީ ކާޑް ތަޢާރަފުކޮށްފައިވަނީ، މިއާއެކު އަލަށް ތަޢާރަފްކުރި އީފާސް އެޕްލިކޭޝަން މެދުވެރިކޮށެވެ.

ޑިޖިޓަލް އައިޑީކާޑު ފަރުމާކޮށްފައިވަނީ ދިވެހި އަދި އިނގިރޭސި ބަހުން ފެންނަގޮތަށެވެ. ނަމަވެސް ކުރިއަށް އޮތްތާނުގައި އެކާޑެއް ހަދާފައިވާ ބަހަކުން ފެންނާނެގޮތް ވާނެކަމަށް ނޭޝަނަލް ސެންޓަރ ފޮރ އިންފޮމޭޝަން ޓެކްނޮލޮޖީން ބުނެއެވެ.