ގދ. މަޑަވެލީގައި އަންހެނަކަށް އަނިޔާކުރި ފިރިހެނަކު ހައްޔަރުކޮށްފިއެވެ.

ފުލުހުން ބުނީ މަޑަވެލީގައި ފިރިހެނަކު އަންހެނަކަށް އަނިޔާ ކުރި މައްސަލައެއް މިއަދު އެއިދާރާއަށް ރިޕޯޓްކޮށްފައިވާ ކަމަށެވެ. އަދި އެމައްސަަލައާ ގުޅިގެން 33 އަހަރުގެ ދިވެހި ފިރިހެނަކު މިއަދު ހައްޔަރު ކޮށްފައިވާ ކަަމަށްވެސް ފުލުހުން މަޢުލޫމާތުދެއެވެ.

މަޢުލޫމާތު ލިބިފައިވާ ގޮތުގައި އަންހެން މީހާއަށް ލިބުނު އަނިޔާތަކަށް މިހާރު އެރަށު ސިއްހީ މަރުކަޒުގައި ގެންދަނީ ފަރުވާދެމުންނެވެ.

އެއަންހެންމީހާއަށް އަނިޔާކުރާ މަންޒަރު މީސް މީޑިއާގައި ދަނީ ދައުރުވަމުންނެވެ. ވީޑީއޯއިން ފެންނަނީ، ފިރިހެނަކު މަގުމަތީގައި އަންހެންމީހާ ދަމާފައި ގެންދާ ތަނެވެ. އޭގެ އިތުރުން އަންހެންމީހާގެ ގައިގައި ޖަހާ މަންޒަރުވެސް ފެނެއެވެ. އަދި އެ ދެމީހުންގެ ފަހަތުން އިތުރު ބަޔަކު ގޮސް އެ ފިރިހެން މިހާ ހުއްޓުވަން މަސައްކަތް ކުރާ މަންޒަރުވެސް ވީޑިއޯއިން ފެނެއެވެ.

ފުލުހުންބުނީ އެ އިދާރާއިން މިހާރުދަނީ މި މައްސަލަ ތަހުގީގު ކުރަމުން ކަމަށެވެ.