ގދ. މަޑަވެލީގައި އިއްޔެ އަނިޔާގެ ޝިކާރައަކަށްވި އަންހެންމީހާ ޖެންޑަރ މިނިސްޓްރީގެ ބެލުމުގެ ދަށަށް ގެންގޮސްފިއެވެ.

ފުލުހުން އިއްޔެ ބުނީ މަޑަވެލީގައި ފިރިހެނަކު އަންހެނަކަށް އަނިޔާ ކުރި މައްސަލައެއް އެއިދާރާއަށް ރިޕޯޓްކޮށްފައިވާ ކަމަށެވެ. އަދި އެމައްސަަލައާ ގުޅިގެން 33 އަހަރުގެ ދިވެހި ފިރިހެނަކު ހައްޔަރު ކޮށްފައިވާ ކަަމަށްވެސް ފުލުހުން މަޢުލޫމާތުދެއެވެ.

އެމައްސަލާގައި ޖެންޑާ މިނިސްޓްރީން މިއަދު ބުނީ، އަންހެން މީހާއަށް ގާނޫނީ ގޮތުން ދިނުމަށް ލާޒިމުކުރާ ރައްކާތެރިކަން މިހާރު އެމިނިސްޓްރީގެ ފަރާތުން އޭނާއަށް ފޯރުކޮށް ދީފައިވާ ކަމަށެވެ. އޭގެއިތުރުން އަނިޔާކުރި ފިރިހެން މީހާގެ މައްސަލަ ބަލައިދިނުމަށް ފުލުސް އޮފީހަށް ހުށައަޅާފައިވާ ކަމަށް މިނިސްޓްރީން ވަނީ ބުނެފައެވެ.

"ވިކްޓިމަށް ދޭން ޖެހޭ ރައްކާތެރިކަމާއި، ސައިކޯސޯޝިއަލް ސަޕޯޓް ދިނުމުގެ މަސައްކަތް އަންނަނީ ކުރަމުން" ޖެންޑަރ މިނިސްޓްރީން ބުނެފައިވެއެވެ.

މަޢުލޫމާތު ލިބިފައިވާ ގޮތުގައި އަންހެން މީހާއަށް ލިބުނު އަނިޔާތަކަށް ތިނަދޫ އަބްދުއްސަމަދު މެމޯރިއަލް ހޮސްޕިޓަލްގައި ވަނީ ފަރުވާދީފައެވެ.

އެއަންހެންމީހާއަށް އަނިޔާކުރާ މަންޒަރު މީސް މީޑިއާގައިވެސް ދަނީ ދައުރުވަމުންނެވެ. ވީޑީއޯއިން ފެންނަނީ، ފިރިހެނަކު މަގުމަތީގައި އަންހެންމީހާ ދަމާފައި ގެންދާ ތަނެވެ. އޭގެ އިތުރުން އަންހެންމީހާގެ ގައިގައި ޖަހާ މަންޒަރުވެސް ފެނެއެވެ. އަދި އެ ދެމީހުންގެ ފަހަތުން އިތުރު ބަޔަކު ގޮސް އެ ފިރިހެން މިހާ ހުއްޓުވަން މަސައްކަތް ކުރާ މަންޒަރުވެސް ވީޑިއޯއިން ފެނެއެވެ.

ފުލުހުންބުނީ އެ އިދާރާއިން މިހާރުދަނީ މި މައްސަލަ ތަހުގީގު ކުރަމުން ކަމަށެވެ.