އެފްކޮންސް އާއި ދިވެހި ސަރުކާރާ ދެމެދު ވެފައިވާ އެއްބަސްވުންތައް ދެމި އޮންނާނެ ކަމަށް ރައީސް އޮފީހުގެ ތަރުޖަމާނު މިއުވާން މުޙައްމަދު ވިދާޅުވެއްޖެއެވެ.

ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި މިއުވާން ވިދާޅުވީ، ތިލަމާލެ ބްރިޖާއި އައްޑޫ މަގުހެދުމުގެ މަޝްރޫޢު ކުރިއަށް ގެންދާ އިންޑިއާގެ އެފްކޮންސްގެ ހިއްސާ އެހެން ކުންފުންޏަކުން ގަތުމަކީ އެ ކުންފުނިން ރާއްޖޭގައި ކުރަމުން އަންނަ މަސައްކަތަށް ބުރޫ އަރާނެ ކަމެއް ނޫންކަމަށެވެ. އަދި އެކަމުގެ ސަބަބުން އެކުންފުންޏާއި ދިވެހި ސަރުކާރާ ދެމެދު ވެފައިވާ އެއްބަސްވުންތަކަށް އަސަރު ނުކުރާނެކަމަށް މިއުވާން ވިދާޅުވިއެވެ.

މިއުވާން މިއަދު ވިދާޅުވީ، ތިލަމާލޭ ބްރިޖުގެ މަސައްކަތް ޝެޑިއުލާއެއްގޮތަށް ކުރިއަށްދާ ކަމަށާއި އެމަސައްކަތްވެސް ނުހުއްޓޭ ކަމަށެވެ. އެގޮތުން އެކި ހިސާބުތަކުގައި ޖަހަންޖެހޭ ތަނބުތައް ޖެހުމުގެ މަސައްކަތް ކުރިއަށްދާކަމަށް މިޢުވާން ވިދާޅުވިއެވެ.

މިއުވާން ވިދާޅުވީ، ދުނިޔޭގެ ބޮޑެތި ހޯލްޑިން ކުންފުނިތަކުން، އެކުންފުނީގެ ދަށުން ހިންގަމުން އަންނަ ސަބްސިޑަރީ ކުންފުނިތަކާއި އެސެޓުތައް ވިއްކުމަކީ އާންމުކަމެއް ކަމަށެވެ. އެގޮތުން ރާއްޖޭގެ ޓީއެމްއޭ ވެސް އެތަށްފަހަރަކު އެކި ޝެއަރ ހޯލްޑަރުންނަށް ވިއްކާލާފައިވާ ކަމަށާއި ނަމަވެސް އެކުންފުނީގެ އޮޕަރޭޝަނަށް ބުރުލެއް ނާރާކަމަށް މިޢުވާން ވިދާޅުވިއެވެ.

އެފްކޮންސް އިންފްރާސްޓްރަކްޗަރއަކީ ރާއްޖޭގައި ކުރިއަށްދާ ތަރައްޤީގެ ބައެއް މަޝްރޫޢުތައް ހަވާލުކޮށްފައިވާ ކުންފުންޏެކެވެ. އެކުންފުނިން ކުރިއަށްގެންދާ މަޝްރޫއުތަކުގެ ތެރޭގައި ތިލަމާލެ ބްރިޖާއި އައްޑޫ މަގު ހެދުން ފަދަ ބިޔަ މަޝްރޫޢުތައް ހިމެނެއެވެ.