ރައީސުލްޖުމްހޫރިއްޔާ އިބްރާހީމް މުހައްމަދު ޞާލިޙް މިރޭ އިނގިރޭސިވިލާތަށް ފުރާވަޑައިގަންނަވާގޮތަށް ގޮތަށް ހަމަޖެހިއްޖެ އެވެ.

ރައީސްގެ މި ދަތުރުފުޅަކީ، އިނގިރޭސިވިލާތުގެ ރަސްކަމާ، ރަސްގެފާނު ޗާލްސް ތިނެއް ރަސްމީކޮށް ހަވާލުވެވަޑައިގަންނަވާ ރަސްމިއްޔާތުގައި ބައިވެރިވެވަޑައިގަތުމަށް ކުރަށްވާ ދަތުރުފުޅެކެވެ.

ރައީސް އޮފީހުން ބުނީ، ރަސްގެފާނު ޗާލްސް ތަހުތުގައި ވެޑުވުމުގެ ރަސްމިއްޔާތުގައި ބައިވެރިވެވަޑައިގަތުމަށް މިރޭ ރައީސް ލަންޑަނަށް ފުރާވަޑައިގަންނަވާނެ ކަމަށެވެ. މިރަސްމިއްޔާތު އޮންނާނީ މިމަހުގެ ހަވަނަ ދުވަހުއެވެ.

ރައީސް ޞާލިޙް އިނގިރޭސިވިލާތަށް ކުރައްވާ މިދަތުރުފުޅުގައި ކޮމަންވެލްތުގެ ލީޑަރުންގެ އިވެންޓާއި، ފޮރިން ޑިގްނިޓަރީސް އަށް ބާއްވާ ރިސެޕްޝަނެއްގައި ބައިވެރިވެވަޑައިގަތުމަށް ހަމަޖެހިފައިވެ އެވެ.

އިނގިރޭސި ވިލާތުގެ ރާނީ އެލިޒަބަތު 2 ވަނަ އަވަހާރަވީ އާލާސްކަންފުޅާ އުޅުއްވުމަށްފަހު 2022 ސެޕްޓެމްބަރ 8 ވީ ބުރާސްފަތި ދުވަހުގައެވެ. އަވަހާރަވީއިރު އުމުރުފުޅަކީ 96 އަހަރެވެ.