ގޭގެއަށް ބިން ލައިނާ ޑެލިވާ ކޮށްދިނުން ހުއްޓާލަން ވޭސްޓް މެނޭޖްމަންޓް ކޯޕަރޭޝަން ވެމްކޯއިން ނިންމައިފިއެވެ.

ވެމްކޯއިން ބުނީ ޕްރީ އޯޑަރކޮށް ގޭބިސީތަކަށް ބިން ލައިނަރ ޑެލިވަރކޮށް ދިނުމުގެ ޚިދުމަތް 10 މޭ ވާ ބުދަ ދުވަހުން ފެށިގެން ހުއްޓާލާނެ ކަމަށެވެ.

ވެމްކޯއިން ގޭގެއަށް ބިން ލައިނާ ޕްރީ އޯޑަރަށް ފޯރުކޮށްދެމުން ގޮސްފައިވަނީ މަދުވެގެން 24 ބޮނޑި އޯޑަރު ކުރުމުންނެވެ. މިޚިދުމަތް ހުއްޓާލިނަމަވެސް އަމިއްލަ ވިޔަފާރިތަކަށް ވެމްކޯގެ ކޮތަޅު ވިއްކުމުގެ ފުރުސަތު އެކުންފުނިން ވަނީ ހުޅުވާލާފައެވެ.

އޭގެ އިތުރުން ވެމްކޯގެ ފްރޮންޓް އޮފީސްތަކުންވެސް ބިން ލައިނާ ގަންނަން ލިބޭނެއެވެ. އަދި އިންޑސްޓްރިއަލް ވިލެޖާއި، ހުޅުމާލެ ޓްރާންސްފަރ ސްޓޭޝަނާއި، ވިލިމާލެ ސްޓްރާންސްފަރ ސްޓޭޝަނުން ކޮތަޅު ލިބޭނެ ކަމަށް ވެމްކޯއިން ވަނީ ބުނެފައެވެ.

ވެމްކޯއިން ދެ ކުލައެއްގެ ކޮތަޅު ވިއްކައެވެ. އެއީ ކަޅުކުލައާއި ފެހިކުލައިގެ ކޮތަޅެވެ. ކުނި އުކާލުމުގައި، ކުނިވާ ޒާތުގެ ކުނި ނުވަތަ އަމިއްލައަށް ފަނާވެދާ ޒާތުގެ ކުނި، ފެހި ކޮތަޅުގައި ބަންދުކުރުމަށާއި، އަދި އެހެނިހެން ކުނި ކަޅު ކޮތަޅުގައި ބަންދުކުރުމަށް ވެމްކޯއިން އެދެއެވެ.