ނުކުޅެދުންތެރިކަން ހުންނަ ފަރާތްތަކަށް ދޭ މާލީ އިނާޔަތުގެ މިންވަރު މުރާޖަޢާކޮށް 6000 ރުފިޔާއާއި ހަމައަށް ބޮޑުކޮށްފިއެވެ.

ނުކުޅެދުންތެރިކަން ހުންނަ ފަރާތްތަކަށް ދޭ މާލީ އިނާޔަތުގެ މިންވަރު ބޮޑުކޮށްފައިވަނީ ނުކުޅެދުންތެރިކަން ހުންނަ މީހުންގެ ޙައްޤުތައް ރައްކާތެރިކުރުމާއި މާލީ އެހީތެރިކަން ފޯރުކޮށްދިނުމުގެ ޤާނޫނުގެ ދަށުން ނުކުޅެދުންތެރިކަން ހުންނަ މީހުންގެ ދަފުތަރުގައި ހިމެނޭ ފަރާތްތަކަށް ފޯރުކޮށްދޭ މާލީއެހީ އިތުރުކުރުމަށް ވަޒީރުންގެ މަޖިލީހުގެ ލަފާފުޅުގެ މަތިން ރައީސުލްޖުމްހޫރިއްޔާ ނިންމެވުމާއި ގުޅިގެންނެވެ.

މިބަދަލާއިއެކު ނުކުޅެދުންތެރިކަން ހުންނަ ފަރާތްތަކަށް މިހާރު ދެވޭ އަސާސީ އެލަވަންސްގެ 50 އިންސައްތަ އިތުރު އިނާޔަތެއްގެ ގޮތުގައި ދިނުމަށް ވަނީ ހަމަޖެހިފައެވެ. އެގޮތުން ނުކުޅެދުންތެރިކަން ހުންނަ މީހުންގެ ދަފްތަރުގައި ހިމެނޭ އެންމެހާ ފަރާތްތަކަށް 2023 ވަނަ އަހަރުގެޖޫންމަހުން ފެށިގެން 3000 ރުފިޔާ ލިބޭނެކަމަށް ނޭޝަނަލް ސޯޝަލް ޕްރޮޓެކްޝަން އޭޖެންސީ، އެންސްޕާއިން ވަނީ ހާމަކޮށްފައެވެ.

މީގެ އިތުރުން ނުކުޅެދުންތެރިކަން ހުންނަ ފަރާތްތަކުގެ ހާލަތްތަކަށް ރިޢާޔަތްކޮށް 65 އަހަރުން ދަށުގެ ފަރާތްތަކަށް އިތުރު އިނާޔަތްތަކެއްވެސް ވަނީ ތައާރަފް ކޮށްފައެވެ. އޭގެ ތެރޭގައި ނުކުޅެދުންތެރިކަމުގެ ސަބަބުން އަމިއްލައަށް ނޫޅެވޭ ނުވަތަ އެހެން ފަރާތަކުން ބަލަހައްޓަން ޖެހޭ ފަރާތްތަކަށް ކެއާރަރ އެލަވަންސްގެ ގޮތުގައި މަހަކު 2000 ރުފިޔާ، އަދި ނުކުޅެދުންތެރިކަމުގެ ސަބަބުން އާންމު ބޭނުންތަކަށް އާދަކޮށް ބޭނުންކުރަންޖެހޭ ކޮންސިއުމަބަލްސް ހޯދުމަށް ސެލްފް ކެއަރ އެލަވަންސްގެ ގޮތުގައި މަހަކު 1000 ރުފިޔާގެ އިތުރުން ނުކުޅެދުންތެރިކަން ހުންނަ 3 ނުވަތަ އެއަށް ވުރެ ގިނަ ފަރާތް ހިމެނޭ ގޭބިސީތަކުގައި ދިރިއުޅޭ ނުކުޅެދުންތެރިކަން

ހުންނަ ފަރާތްތަކަށް މަހަކު 1000 ރުފިޔާ ދިނުން ހިމެނެއެވެ.

ނުކުޅެދުންތެރިކަން ހުންނަ ފަރާތްތަކަށް ސަރުކާރުން ދޭ މާލީ އެހީގެ ޕްރޮގްރާމުގައި ހުސްވިމަހުގެ ނިޔަލަށް 11،371 މީހަކު ވަނީ ރަޖިސްޓްރީކޮށްފައެވެ. މިފަރާތްތަކަށް މިއަހަރުގެ ޖެނުއަރީ މަހުން ހުސްވި މެއި މަހުގެ ނިޔަލަށް 111.22 މިލިއަން ރުފިޔާ، މާލީ އެހީގެގޮތުގައި ސަރުކާރުން ވަނީ ޚަރަދުކޮށްފައެވެ.